BUU Qaýipsizdik Keńesiniń qazirgi tóraǵasy Qazaqstannyń jumysyna joǵary baǵa berdi

ASTANA. QazAqparat - Kýveıt elshiligi úsh birdeı aıtýly dataǵa arnap resmı qabyldaý sharasyn ótkizdi. Bıyl Qazaqstan men Kýveıt arasyndaǵy dıplomatııalyq baılanystardyń ornatylýyna - 25 jyl. Budan bólek, atalǵan eldiń ulttyq kúni jáne Iraktyń quramynan shyqqanyna 27 jyl tolyp otyr, dep xabarlaıdy QazAqparat tilshisi.

Resmı sharanyń ashylý saltanatynda Kýveıttiń Tótenshe jáne Ókiletti elshisi Tarık Abdýlla al-Faradj Qazaqstannyń BUU Qaýipsizdik Keńesindegi jumysyn erekshe atap ótti. "Ótken aıda Qazaqstannyń BUU-nyń Qaýipsizdik Keńesindegi tóraǵalyǵy sátti ótti. Sizderdiń bastamalaryńyzben beıbitshilik pen qaýipsizdikke úndegen asa mańyzdy aımaqtyq jáne xalyqaralyq máseleler kóterildi. Al, eń bastysy, kez kelgen shıelenisti dıplomatııalyq jolmen sheship, yntymaqtastyqty kúsheıtý sharalaryna basa nazar aýdaryldy. Prezıdent Nursultan Nazarbaevtyń tóraǵalyǵymen BUU Qaýipsizdik Keńesiniń otyrysy uıymdastyryldy. Qazaqstan Prezıdenti bárimizdi jappaı qyryp joıatyn qarýsyz álemdi qurýǵa úndedi", - dep atap kórsetti elshi Tarık Abdýlla al-Faradj.
 

Aıta ketken jón, osy aıda BUU Qaýipsizdik Keńesine Kýveıt tóraǵalyq etýde. Osyǵan oraı, el astanasy - El-Kýveıtte Irakty qaıta qurýǵa arnalǵan xalyqaralyq konferentsııa uıymdastyryldy. Sol jerde qatysýshy memleketter osy bastamaǵa 30 mlrd dollar bólip berýge kelisti. Budan bólek, xalyqaralyq konferentsııa aıasynda "DAISh"-qa qarsy xalyqyralyq koalıtsııanyń mınıstrlikter deńgeıindegi kezdesýi ótti.
 

 BUU Qaýipsizdik Keńesiniń jumysy jaıynda aıta kele, elshi Tarık Abdýlla al-Faradj Qazaqstan men Kýveıttiń kózqarasy bir ekenin erekshe atap ótti. "25 jyldyń ishinde eki eldiń mádenıet, ekonomıka jáne taǵy basqa salalar boıynsha ózara yntymaqtastyǵy kúsheıip keledi. Biz osy baılanystardy damytýǵa múddelimiz. Onyń ústine BUU Qaýipsizdik Keńesi boıynsha áriptes bolyp, ortaq múdde úshin xalyqaralyq máselelerdi sheshýge atsalysyp kelemiz", - dep atap kórsetti elshi myrza.
  

Óz kezeginde QR Syrtqy ister vıtse-mınıstri Aqylbek Qamaldınov Kýveıttiń aımaqtaǵy asa mańyzdy áriptes memleket ekenin jetkizdi. "Búginde eki el ózara senimge negizdelgen konstrýktıvti dıalogtyń deńgeıine shyqty. Biz bir-birimizdiń saıası bastamalaryn qoldap otyramyz. Al saýda-ekonomıkalyq turǵyda yntymaqtastyq baılanystardy áli de keńeıtýge bolady", - dedi A.Qamaldınov.