BUU Qaýipsizdik Keńesinde bes jańa turaqty emes múshe paıda boldy
ASTANA. Qazannyń 13-i. QazAqparat - Kolýmbııa, Úndistan, Ońtústik Afrıka Respýblıkasy, Germanııa jáne Portýgalııa BUU Qaýipsizdik Keńesiniń turaqty emes músheleri atandy.
Reglamentke sáıkes, Qaýipsizdik Keńesiniń turaqty emes músheleri jasyryn daýys berý jolymen saılandy, dep habarlaıdy ITAR-TASS agenttigi.
Kandıdatýralar aımaqtyq toptardyń attarynan usynyldy. Bıyl Afrıka jáne Azııa óńirlerine bir-bir orynnan, batyseýropalyq jáne basqa memleketterdiń toptaryna -eki orynnan, Latyn Amerıkasy jáne Karıb basseıni elderine bir orynnan bólingen bolatyn.
Kolýmbııa, Úndistan, Ońtústik Afrıka Respýblıkasy jáne Germanııa keshe bolǵan daýys berýdiń birinshi týrynda-aq Bas Assambleıa delegattarynyń qajetti daýysyn ala aldy. Al ekinshi týrda delegattar Portýgalııa men Kanadanyń qaısysy Qaýipsizdik Keńesiniń 2011-2012 jyldarǵa turaqty emes múshesi bolatynyn anyqtaı almady. Úshinshi týr bastalardyń aldynda Kanada Portýgalııanyń paıdasy úshin óz kandıdatýrasyn alyp tastap, nátıjesinde sońǵy oryn Portýgalııaǵa buıyrdy.
