BUU Qaýipsizdik Keńesi qaqtyǵys aımaqtarynan balalardy qaıtarýdaǵy Qazaqstannyń tájirıbesin talqylady

NЬıÝ-IORK. QazAqparat - BUU Qaýipsizdik Keńesiniń músheleri jáne Nıý-Iorktegi BUU janyndaǵy basqa memleketterdiń 100-ge jýyq ókilderi beınekonferentsııada Qazaqstan men basqa elderdiń qaqtyǵys aımaqtarynan balalardy qaıtarý jáne olardy keıinnen qaıta biriktirý boıynsha tájirıbesin talqylady, dep habarlaıdy QazAqparat QR Syrtqy ister mınıstrliginiń resmı saıtyna silteme jasap.

Qarýly qaqtyǵystardaǵy balalardyń problemalaryna jáne osy saladaǵy yntymaqtastyqty tereńdetý joldaryn izdeýge arnalǵan BUU Qaýipsizdik Keńesiniń «Arrııa formýlasy» boıynsha kezdesýin BUU janyndaǵy Qazaqstan men Reseıdiń Turaqty ókildikteri BUU Bas hatshysynyń Balalar jáne qarýly qaqtyǵys jónindegi arnaıy ókiliniń Hatshylyǵymen birlesip uıymdastyrdy.

Beınekonferentsııaǵa qatysýshylar balalardy qaqtyǵys aımaǵynan bosatý jáne olardy otanyna qaıtarý boıynsha pikir men tájırıbemen almasty, sondaı-aq balalardy qoǵamda, ásirese COVID-19 pandemııasy jaǵdaıynda ońaltý jáne qaıta biriktirý protsesinde turǵan syn-tegeýrinderdi qarastyrdy.

QR BUU janyndaǵy Turaqty ókili Maǵjan Іlııasov Qazaqstan 2019 jyly bastalǵan óz azamattaryn, birinshi kezekte balalardy, Sırııa men Iraktan qaıtarý boıynsha kúsh-jigerin jalǵastyratynyn málimdedi. Ol 2019-2020 jyldary «Jýsan» jáne «Rýsafa» arnaıy operatsııalary barysynda otanyna oralǵan balalar men áıelderdiń áleýmettik-psıhologııalyq ońaltý baǵdarlamasynyń nátıjeleri jáne qoǵamǵa reıntegratsııa protsesiniń erekshelikteri týraly aıtyp berdi.

«Qazaqstannan qashqandardyń 80-85%-y óz sheshimderine ókinip, jańylysqandaryn moıyndaıdy», - dep atap ótti M. Іlııasov.

«Balalar qylmystyń kýási boldy jáne ata-analarynyń áreketteriniń qurbany boldy. Olar bomba jarylystary men ólimdi kórdi. Bizdiń mindetimiz – bul balalardyń ómirine eleýli áser etpes buryn jaraqattan keıingi sındromdardyń aldyn alý boıynsha jumysty jalǵastyrý», - dep atap ótti Qazaqstannyń BUU janyndaǵy Turaqty ókili.

Іs-shara qatysýshylaryna «Jýsan» operatsııasy jáne Sırııa men Iraktan oralǵan áıelder men balalardy ońaltýdyń qazaqstandyq baǵdarlamasynyń nátıjeleri týraly 5 mınýttyq beınerolık kórsetildi.

AQSh, Frantsııa, Ulybrıtanııa, Qytaı, Norvegııa, Vetnam, Kenııa, Týnıs jáne BUU Qaýipsizdik Keńesine múshe basqa da elderdiń ókilderi óz sózderinde Qazaqstannyń 600-den astam azamatyn, onyń ishinde áıelder men balalardy repatrıatsııalaý boıynsha praktıkalyq tájirıbesin, olardyń qoǵamda reıntegratsııalanýyn joǵary baǵalady. Qazaqstandyq mamandardyń balalardy áleýmettik-psıhologııalyq qalpyna keltirýge jáne olardyń stıgmatızatsııalanýynyń aldyn alýǵa baǵyttalǵan kúsh-jigerine erekshe nazar aýdaryldy.

BUU Bas hatshysynyń Balalar jáne qarýly qaqtyǵys jónindegi arnaıy ókili Vırdjınııa Gamba óz sózinde Qazaqstan men birqatar basqa elderdiń balalardyń múddelerin qorǵaý isine beıildiligin erekshe atap ótti. Onyń aıtýynsha, búginde Irak pen Sırııanyń soltústik shyǵysynda sheteldik azamattardyń myńdaǵan balalary áli de kúrdeli jaǵdaıda tur.

BUU Qaýipsizdik Keńesiniń músheleri qaqtyǵys aımaqtarynan balalardy qaıtarý boıynsha Qazaqstannyń tájirıbesin talqylady.