BUU Kaspıı teńizindegi jaǵdaı qanshalyqty qaýipti ekenin eskertti
ASTANA. KAZINFORM — Kaspıı teńizin saqtap qalý úshin shuǵyl is-qımyldar jasalý kerek. Bul týraly elordadaǵy Óńirlik ekologııalyq sammıtte BUU Bas hatshysynyń orynbasary jáne BUU Qorshaǵan orta baǵdarlamasynyń atqarýshy dırektory Inger Andersen málim etti.
Onyń aıtýynsha, Kaspıı teńizindegi sý deńgeıi keıingi 30 jylda shamamen eki metrge tómendedi, al ǵasyrdyń sońyna qaraı áli de azaıýy múmkin.
- Kaspıı teńizi – ol biregeı ekojúıe, álemdegi eń úlken jabyq sý aıdyny. Ol bes eldegi mıllıondaǵan adamdardyń ómir súrýin qamtamasyz etip otyr. Biraq búginde Kaspıı óte qıyn jaǵdaıda tur, ıaǵnı sý deńgeıiniń tómendeýi porttarǵa, balyq sharýashylyǵyna, ınfraqurylym men jaǵalaýdaǵy eldi mekenderge qaýip tóndiredi, - dedi Inger Andersen.
Ol osy ahýalǵa klımattyń ózgerýi áser etip otyrǵanyn, Edilden keletin sý aǵynynyń azaıýyn, resýrstardy shamadan tys paıdalaný qarqyn alǵanyn atap ótti.
- Birlese áreket etýimiz kerek. Osy óńirdegi elder bul quldyraýdy toqtatýdyń jolyn taýyp, yntymaqtastyqtyń naqty tetikterin ázirleýi úshin Astanada ótip jatqan Óńirlik ekologııalyq sammıtte ýaǵdalastyq tetikterin pysyqtaýy tıis, - dedi ol.
I.Andersenniń aıtýynsha, osy jyly óńirlik is-sharalar josparyn aıaqtap, ol ǵylymı monıtorıng, klımatqa beıimdelý jáne Kaspıı teńiziniń ekojúıesin qorǵaýdyń jol kartasy bolýy tıis.
Aıta keteıik, buǵan deıin Qazaqstan Reseıge Edil sýyn birlesip retteý týraly usynys jasaıtynyn jazǵan edik.
Buǵan deıin habarlanǵandaı, Óńirlik ekologııalyq sammıtte Ázerbaıjan Premer-mınıstri Álı Asadov Kaspıı teńizi mańyndaǵy elderdiń kúsh-jigerin biriktirýge shaqyrdy.
