BUU qarjylyq daǵdarysqa ushyraýy múmkin be
ASTANA. KAZINFORM – BUU Bas hatshysynyń resmı ókili Stefan Dıýjarrık uıymnyń qarjylyq qıyndyqtarǵa tap bolǵanyn rastaǵanymen, onyń qashan qarajatsyz qalatynyn kórsetetin naqty merzim joq ekenin málimdedi. Bul týraly resmı ókil apta saıynǵy baspasóz brıfınginde aıtty.
Onyń aıtýynsha, ótken aptada Qytaı Halyq Respýblıkasynan shamamen 800 mıllıon dollar kóleminde ishinara tólem túsken, bul uıymnyń qarjylyq jaǵdaıyn ýaqytsha jeńildetken.
– Uıymnyń kúıreýine qatysty naqty kún belgilenbegen. Biz barlyq múshe memleketterdi óz mindettemelerin oryndaýǵa shaqyramyz, – dedi Dıýjarrık.
BUU-daǵy qarjy máselesi alǵash ret aıtylyp otyrǵan joq. Qańtar aıynda uıymnyń Bas hatshysy Antonıý Gýterrısh múshe memleketterge joldaǵan hatynda BUU «qarjylyq kúıreý qaýpine» tap bolǵanyn eskertken edi. Onyń aıtýynsha, 2025 jyldyń sońyna qaraı tólenbegen jarnalardyń kólemi rekordtyq 1,57 mlrd dollarǵa jetken.
Reuters agenttiginiń málimetine súıensek, Gýterrısh uıymnyń ótimdilik daǵdarysy tereńdep bara jatqanyn aıtyp, eger memleketter jarnalaryn ýaqytyly tólemese, BUU qolma-qol qarajatsyz qalýy múmkin ekenin málimdegen.
BUU bıýdjetiniń negizgi bóligine eń kóp úles qosatyn elder — AQSh pen Qytaı. Uıymnyń turaqty bıýdjetiniń shamamen 22 paıyzyn AQSh, al 20 paıyzyn Qytaı qarjylandyrady.
BUU derekterine sáıkes, AQSh uıym aldyndaǵy eń iri boryshker bolyp otyr. Jyl basynda Vashıngtonnyń turaqty bıýdjet boıynsha bereshegi 2,19 mlrd dollardy quraǵan. Budan bólek, AQSh-tyń qazirgi jáne burynǵy bitimgerlik mıssııalar boıynsha taǵy 2,4 mlrd dollardan astam qaryzy bolǵan.
Qarjylyq qıyndyqtarǵa baılanysty BUU 2026 jylǵa arnalǵan bıýdjetin shamamen 7 paıyzǵa qysqartyp, 3,45 mlrd dollar deńgeıinde bekitti. Sonymen qatar uıym tıimdilikti arttyrý jáne shyǵyndardy azaıtý maqsatynda UN80 reformalar baǵdarlamasyn iske asyryp jatyr.
BUU basshylyǵy qazirgi jaǵdaıda uıym jumysynyń tolyq toqtaýy týraly sóz qozǵaýǵa erte ekenin aıtqanymen, múshe memleketterdiń jarnalardy ýaqytyly tóleýi uıymnyń qalypty qyzmeti úshin sheshýshi faktor bolyp qala beredi.
Aıta keteıik, BUU-nyń mıssııalaryna qatysatyn áskerılerge tólemderdi aýdarý tetigi jeńildegenin jazdyq.
