BUU qaryzy bar alty memleketti daýys berý quqyǵynan aıyrdy

ASTANA. QazAqparat - BUU Bas assambleıasy múshelik jarnany tólemegen alty eldi daýys berý quqyǵynan ýaqytsha aıyrdy. Bereshegi eń kóp el  - Venesýela. Bul týraly BUU-nyń beısenbi, 24 aqpan kúni jarııalanǵan habarlamasynda aıtylady.

Qaryzy eń kóp el bolyp sanalatyn Venesýela tek $24 mln. qarjyny tólegen soń daýys berýge qatysa alady. Qalǵan bes el -  Kabo Verde, Lıvııa, Papýa-Jańa Gvıneıa, Sýdan men  Vanýatý BUU Bas assambleıasynyń 71-sessııasynyń jumysy aıaqtalǵanǵa deıin, ıaǵnı 2017 jyldyń kúz mezgiline deıin daýys berý quqyǵynan shettetildi.

Boryshker-elder eki jyldyq somany tólegennen keıin ǵana daýys berý quqyǵyn qaıtara alady. Bul týraly BUU-nyń jańa bas hatshysy Antonıý Gýterrısh qańtar aıynyń sońynda málimdedi. Jyl saıynǵy jarna somasy ár elge jeke esepteledi.