BUU qart adamdardyń quqyqtaryn qorǵaý tásilderin qaıta qaraýǵa shaqyrdy
ASTANA. KAZINFORM - Halyqtyń qarqyndy qartaıýy jáne kognıtıvtik buzylystar sanynyń ósýi qart adamdardyń quqyqtaryn qorǵaýǵa qatysty jańa tásildi talap etedi, dep habarlaıdy BUU jańalyqtar qyzmeti.
Bul týraly BUU-nyń qart adamdardyń quqyqtary jónindegi táýelsiz sarapshysy Zvezdan Pırtoshek BUU Adam quqyqtary jónindegi keńesiniń 63-sessııasynda baıandamasyn tanystyrý kezinde málimdedi.
Onyń aıtýynsha, qoǵam áli de egde jasty dármensizdik pen derbestikten aıyrylý turǵysynan qabyldaıdy. Mundaı kózqaras qart azamattarǵa kórsetiletin kútim talaptarynyń tómendeýine jáne olardyń quqyqtarynyń shektelýine ákelýi múmkin.
Sarapshy kognıtıvtik buzylystar adamnyń qadir-qasıetin, quqyq sýbektiligin nemese negizgi adam quqyqtaryn joǵaltýdy bildirmeıtinin atap ótti. Sóıleý jáne oılaý qabiletinde qıyndyqtar bolsa da, qart adamdar óz qundylyqtaryn, ádetterin saqtaıdy jáne ómirine qatysty sheshimder qabyldaýǵa qatysýǵa quqyly.
Pırtoshek medıtsınalyq dıagnoz adamnyń áreket qabilettiligin shekteýge negiz bolatyn jaǵdaılarǵa da nazar aýdardy.
Onyń aıtýynsha, týystar men mamandardyń mindeti – adam úshin sheshim qabyldaý emes, onyń óz erkin bildirýine jáne múmkindiginshe derbestigin saqtap qalýyna jaǵdaı jasaý.
Sarapshynyń pikirinshe, bul rette memleketter erekshe ról atqarýy tıis. Ol jasyna nemese dıagnozyna baılanysty adamdardyń quqyqtaryna nuqsan keltirýi múmkin zańnamany qaıta qaraýǵa, sondaı-aq eń aldymen adamnyń ózine baǵdarlanǵan uzaq merzimdi kútim júıesin damytýǵa shaqyrdy.
BUU-da medıtsınalyq jáne áleýmettik kómektiń tıimdiligin tek klınıkalyq kórsetkishter boıynsha ǵana emes, qart adamnyń óz ómirine yqpal etý múmkindigin saqtap qalǵan-qalmaǵany arqyly da baǵalaý qajet ekenin atap ótti.
Osyǵan deıin Qazaqstanda qartarǵa qandaı áleýmettik qoldaý kórsetiletini týraly jazdyq.
