BUU qamqorlyǵymen aýǵan halqyna jan-jaqty kómekti ulǵaıtý qajet - Prezıdent

ASTANA. QazAqparat – BUU qamqorlyǵymen aýǵan halqyna jan-jaqty kómek kórsetýdi ulǵaıtý qajet. Bul týraly Memleket basshysy Qasym-Jomart Toqaev «Ortalyq Azııa – Eýropalyq Odaq» basshylarynyń ekinshi kezdesýinde aıtty, dep habarlaıdy QazAqparat tilshisi.

«Qazaqstan Eýropalyq odaqtyń bizdiń syrtqy saıası bastamalarymyzdy ilgeriletýge jáne aýqymdy demokratııalyq qaıta qurýdy iske asyrýǵa qoldaýyn joǵary baǵalaıdy. Biz árdaıym Ortalyq Azııanyń barlyq aımaqpen jáne eldermen jemisti yntymaqtasa otyryp, beıbitshilik pen progrestiń taralý oshaǵy bolýyn qoldaımyz. Eýropalyq Odaqpen kópqyrly seriktestigimizdiń turaqty damýy óńirdegi qaýipsizdik pen turaqtylyqqa, onyń ishinde Aýǵanstandaǵy jaǵdaıǵa da tikeleı baılanysty», - dedi Memleket basshysy.

Qasym-Jomart Toqaev Aýǵanstandaǵy gýmanıtarlyq daǵdarystyń aldyn alý úshin halyqaralyq qaýymdastyqtyń kúsh-jigerin qoldaýdy jalǵastyrý mańyzdy ekenin basa aıtty.

«Qazaqstan jaqynda ǵana kezekti kómek paketi túrinde Aýǵanstan halqyna azyq-túlik taýarlaryn jiberdi. BUU qamqorlyǵymen aýǵan halqyna jan-jaqty kómek kórsetýdi ulǵaıtý qajet. Osy turǵyda Almatyda BUU-nyń Ortalyq Azııa men Aýǵanstan úshin ornyqty damý maqsattary jónindegi óńirlik ortalyǵyn qurý jónindegi bastama ózekti sanalady», - dedi Prezıdent.