BUU Izraıldiń HAMAS múshelerine ólim jazasyn engizý týraly zańyn synady
ASTANA. KAZINFORM – BUU Izraılde HAMAS qozǵalysyna qarasty bólimshe múshelerine ólim jazasyn qoldanýdy qarastyratyn jańa zańdy qatań synǵa aldy, dep habarlaıdy IRNA agenttigi.
Uıym ókilderiniń málimdeýinshe, mundaı sharalar halyqaralyq adam quqyqtary normalaryna qaıshy keledi jáne kemsitýshilik sıpatqa ıe.
Bastamaǵa qatysty synı pikirdi BUU Bas hatshysynyń resmı ókiliniń orynbasary Farhan Hak bildirdi. Ol Izraıl parlamentiniń HAMAS qozǵalysyna baılanysty «Nýhba» bólimshesiniń qolǵa túsken múshelerine ólim jazasyn taǵaıyndaýǵa múmkindik beretin zańnyń maquldanýyna qatysty ún qatty.
Farhan Haktyń aıtýynsha, BUU jekelegen toptarǵa erekshe jaza túrlerin qoldanýdy kózdeıtin kez kelgen zańǵa qarsy.
– Halyqaralyq quqyq qarýly qaqtyǵys jaǵdaıynda da negizgi adam quqyqtarynyń saqtalýyn talap etedi, – dedi ol.
Jańa zańdy Knesset kópshilik daýyspen qabyldaǵan. Qujat Izraıl sottaryna shabýyldarǵa qatysqan adamdarǵa ólim jazasyn taǵaıyndaýǵa, sondaı-aq ashyq sot protsesterin ótkizýge quqyq beredi.
Bul sheshim Izraıl ishinde de, halyqaralyq deńgeıde de qyzý pikirtalas týdyrdy. Zańdy qoldaýshylar ony HAMAS shabýyldaryna qajetti jaýap dep esepteıdi. Al quqyq qorǵaý uıymdary halyqaralyq gýmanıtarlyq quqyqtyń buzylýy jáne qaqtyǵystyń odan ári ýshyǵý qaýpi týraly eskertip otyr.
BUU sońǵy onjyldyqtarda álemdik tájirıbe ólim jazasynan bas tartý baǵytyna bet alǵanyn da eske saldy. Uıym ókilderiniń aıtýynsha, joǵary jazany saıası nemese toptyq belgiler boıynsha qoldaný halyqaralyq qaýymdastyqta eleýli alańdaýshylyq týǵyzady.
Buǵan deıin 2023 jylǵy 7 qazandaǵy teraktilerge qatysy bar dep aıyptalǵandarǵa ólim jazasyn taǵaıyndaı alatyn arnaıy trıbýnal qurý týraly zań jobasy Izraıldiń 120 oryndyq Knessetinde 93 depýtattyń qoldaýymen qabyldanǵany habarlanǵan edi. Qarsy daýys bolmaǵan.
Arnaıy trıbýnal Ierýsalım qalasynda ornalasady. Sot otyrystary ashyq túrde ótip, aýdıo jáne vıdeo formatta jazylady. Sondaı-aq tyńdaýlar arnaıy veb-saıt arqyly tikeleı kórsetiledi.
