BUU: Izraıldiń Gazadaǵy áreketinen keminde 21 myń bala múgedek bolyp qaldy

ASTANA. KAZINFORM – Izraıldiń 2023 jyldyń 7 qazanynan beri palestınalyq anklavtaǵy áskerı áreketteriniń saldarynan Gazada keminde 21 myń bala múgedek bolyp qaldy. Bul málimetterdi Jenevada BUU Múgedekterdiń quqyqtary jónindegi komıtetiniń sarapshylary keltirdi, dep jazady reseılik TASS.

Olar keltirgen málimetterge qaraǵanda, Gazada shamamen 40,5 bala soǵysqa qatysty jaraqattar alǵan.

Sondaı-aq 2023 jyldyń 7 qazany men 2025 jyldyń 21 tamyzy aralyǵynda Gazanyń 157 myńan astam turǵyny jaraqat aldy. Olardyń 25 paıyzynyń ómir boıyna múgedek bolyp qalý qaýpi bar.

Aıta keteıik, 2023 jyldyń 7 qazanynda HAMAS jaqtastarynyń Gaza sektorynan Izraıl aýmaǵyna kirgeninen soń Taıaý Shyǵystaǵy jaǵdaı kúrt shıelenisti. Óıtkeni ol kezde HAMAS jaqtastary Gaza men Izraıldiń shekaralas aýmaǵyndaǵy eldi meken turǵyndaryn óltirip, 250-den astam adamdy kepilge alǵan bolatyn.

Buǵan jaýap retinde Izraıl HAMAS-tyń áskerı jáne saıası qurylymdaryn joıý jáne urlanǵan adamdardy qaıtarý úshin anklavta áskerı operatsııa bastady.

Gazanyń Densaýlyq saqtaý mınıstrliginiń málimetterinshe, áskerı áreketterdiń saldarynan 63 myńnan astam palestınalyq mert boldy, 161 myńnan astam adam jaraqat aldy. Sonymen qatar 367 jergilikti turǵyn, sonyń ishinde 131 sábı ashtyqtan óldi.

BUU-nyń 18 táýelsiz sarapshydan turatyn Múgedekterdiń quqyqtary jónindegi komıteti kelisimmen jumys isteıin organ.

Ol Múgedekterdiń quqyqtary týraly konventsııany qatysýshy memleketterdiń oryndaýyna monıtorıng júrgizedi. 2025 jyldyń qyrkúıegine qaraı Konventsııany 192 memleket pen Eýroodaqty qosa alǵanda, 193 tarap ratıfıkatsııalaǵan.

Osyǵan deıin Gaza sektorynda tumaýdyń aýyr túri taralyp jatqany jóninde jazdyq.