BUU Izraıldi qarýmen qamtamasyz etýdi toqtatýdy talap etti

ASTANA. KAZINFORM – BUU-nyń adam quqyqtary jónindegi sarapshylary Izraılge qarý-jaraq pen oq-dári jetkizýdi toqtatýǵa shaqyrdy. Olardyń pikirinshe, mundaı elder genotsıdke qatysýshy elder qatarynan tabylýy múmkin.

Bul týraly Adam quqyqtary jónindegi Joǵarǵy komıssar basqarmasy taratqan BUU-nyń arnaıy baıandamashylarynyń málimdemesinde aıtylǵan.

«Izraılge qarý-jaraq pen oq-dárilerdi berý adam quqyqtary men halyqaralyq gýmanıtarlyq quqyqty buzý bolyp tabylady jáne memlekettiń halyqaralyq qylmystarǵa, sonyń ishinde genotsıdke qatysý qaýpin týdyrýy múmkin», - delingen qujatta.

Sarapshylardyń paıymdaýynsha, qarý óndirýshiler eksporttyq lıtsenzııalarǵa sáıkes júzege asyrylsa da, Izraılge jetkizýdi toqtatýy kerek. Málimdemede jetkizýshiler retinde BAE Systems, Boeing, Caterpillar, General Dynamics, Lockheed Martin, Northrop Grumman, Oshkosh, Rheinmetall AG, Rolls-Royce Power Systems, RTX jáne ThyssenKrupp atalǵan.

Sarapshylar Halyqaralyq sottyń Izraılge Rafahtaǵy áskerı shabýylyn dereý toqtatýdy buıyrǵan taıaýdaǵy sheshimin, sondaı-aq Halyqaralyq qylmystyq sot prokýrory Izraıldiń basshylaryn soǵystaǵy qylmystary men aıyptaýlar boıynsha tutqyndaýǵa order berý týraly ótinishin eske saldy.