BUU Izraıl qonystarymen baılanysty kompanııalar tizimin jańartty
ASTANA. KAZINFORM – Birikken Ulttar Uıymy basyp alynǵan Palestına aýmaǵyndaǵy Izraıl qonystaryna baılanysty qyzmet júrgizetin kompanııalar tizimin jańartty. Jańa tizimge 11 elden barlyǵy 214 kompanııa endi, dep habarlaıdy Anadolu.
BUU-nyń Adam quqyqtary jónindegi basqarmasy Izraıl qonystaryna baılanysty belgili bir qyzmet túrlerine qatysy bar kompanııalar jónindegi derekqordyń jańartylǵan nusqasyn jarııalady.
Derekqor BUU Adam quqyqtary jónindegi keńesiniń tapsyrmasymen alǵash ret 2020 jyly jarııalanǵan. Keıin ol 2023 jáne 2025 jyldary jańartyldy. 2025 jylǵy nusqada 11 eldiń 158 kompanııasy bolǵan.
Bıylǵy jańartý aýyl sharýashylyǵy, kólik, qoıma qyzmeti, qaldyqtardy basqarý, energetıka, tamaq ónerkásibi, qonaqúı salalarynda jumys isteıtin kompanııalardy qamtıdy.
2024 jyly aqparat usynýǵa jarııalanǵan ashyq úndeýden keıin BUU basqarmasyna 596 kompanııaǵa qatysty málimet túsken. Buǵan deıin olardyń 215-i taldanǵan. Sońǵy jańartý kezinde qalǵan 381 kompanııanyń 126-sy qarastyryldy.
Tekserilgen 126 kásiporynnyń 61-i tizimge qosyldy. Al buǵan deıin tizimde bolǵan bes kompanııanyń atalǵan qyzmet túrlerimen endi aınalyspaıtyny anyqtalyp, derekqordan shyǵarylǵan. Nátıjesinde tizimdegi kompanııalardyń jalpy sany 214-ke jetti. Bul derekti ózge halyqaralyq aqparat kózderi de habarlady.
– Bul esep kompanııalarǵa adam quqyqtary salasyndaǵy jaýapkershiligin taǵy bir márte eske salady. Olar adam quqyqtarynyń buzylýyna nemese teris paıdalanylýyna qatysy bolmaýy úshin tıisti tekserý júrgizýge tıis, – dedi BUU-nyń Adam quqyqtary jónindegi Joǵarǵy komıssary Folker Tıýrk.
Jańartylǵan tizimde Izraıl kompanııalarymen qatar AQSh, Nıderland, Lıýksembýrg, Ispanııa, Frantsııa, Qytaı, Ulybrıtanııa, Germanııa jáne basqa elderde tirkelgen halyqaralyq kompanııalar da bar.
Olardyń qatarynda Airbnb Inc., Booking Holdings Inc., Expedia Group Inc., Motorola Solutions Inc., Re/Max Holdings Inc., TripAdvisor Inc., Booking.com B.V., CAF, Egis, Fosun International Ltd., J.C. Bamford Excavators Ltd. jáne Heidelberg Materials AG sekildi kompanııalar atalǵan.
BUU baıandamasynda kásiporyndar halyqaralyq deńgeıde moıyndalǵan standarttarǵa sáıkes adam quqyqtaryn saqtaý jónindegi mindettemelerin oryndaýǵa jáne olardyń qyzmetinen týyndaıtyn yqtımal teris saldardy joıýǵa tıisti sharalar qabyldaýǵa shaqyrylǵan.
Sondaı-aq memleketterge kásipkerlik qyzmetpen baılanysty adam quqyqtarynyń buzylýynan zardap shekken adamdardyń halyqaralyq quqyqqa sáıkes tıimdi quqyqtyq qorǵaýǵa qol jetkizýin qamtamasyz etý usynylǵan.
Aıta keteıik, BUU Taıaý Shyǵystaǵy qaqtyǵystar týrızm ósimin baıaýlatatynyn málimdedi.
