BUU: Izraıl Gazaǵa shabýyldy kúsheıtti, óńir turǵyndary kóshýge májbúr

ASTANA. KAZINFORM - Izraıl Gaza sektoryna shabýyldy kúsheıtip, kóship qonǵannan ábden qajyǵan halyqty qonystaryn tastap ketýge májbúrlep otyr.

Bul týraly BUU Bas hatshysynyń ókili Stefan Dıýjarrık aptalyq brıfıng barysynda málim etti, dep jazady Anadoly.

BUU ókili Izraıl kúshteriniń Gazada saqtalyp qalǵan kópqabatty ǵımarattarǵa soqqy jasap jatqanyn atap ótti.

- Olardyń kópqabatty nysandarǵa áli de bolsa shabýyldaıtyn oılary bar. Bul bizdi alańdatyp otyr, -  dedi ol.

Dıýjarrık eksklav turǵyndarynyń jıi qonys aýdaratynyna nazar aýdardy.

Onyń aıtýynsha, resmı rastalǵan asharshylyq óńirdegi jaǵdaıdy odan saıyn ýshyqtyryp otyr.

- Halyq ońtústikke qaraı bara almaı otyr, halyq baryp jatqan aýdandarda adam sany shektep tys kóp, sonymen qatar jol júrý shyǵyny 1000 AQSh dollaryna deıin barǵan, — dedi ol.

BUU ókiliniń aıtýynsha, osyndaı qıyndyqtarǵa qaramastan, sońǵy eki kúnniń ishinde ǵana Gazanyń soltústiginen ońtústigine qaraı úsh myń adam qonys aýdarǵan.

Dıýjarrık Izraıldiń aımaqqa gýmanıtarlyq kómek jetkizýge shekteý qoıyp, kedergi keltirip otyrǵanyn atap ótti.

Qańtar aıynan beri Iordan ózeniniń sol jaǵalaýynda 2 780 Palestına turǵyny jaralanǵan.

Izraıl okkýpatsııalaǵan Batys jaǵalaýdaǵy sońǵy oqıǵalarǵa toqtalǵan Dıýjarrık, bıylǵy jyldyń qańtar aıynan beri bul óńirde Izraıl kúshteri men zańsyz qonystanýshylardyń áreketteri saldarynan 2 780 palestındiktiń jaralanǵanyn málimdedi.

Osyǵan deıin Izraıl Gaza sektoryndaǵy kópqabatty ǵımaratty qıratqany týraly jazdyq.