BUU: Izraıl Gazadaǵy jýrnalısterdi qasaqana óltirip jatyr
JENEVA. KAZINFORM – Palestına eksklavy BAQ qyzmetkerleri úshin álemdegi eń qaýipti jerlerdiń birine aınaldy, dep jazdy Anadoly agenttigi.
Izraıl áskerıleri tarapynan Gaza sektorynda jýrnalısterdiń óltirilýi ádeıi jasalǵan áreket bolýy múmkin.
Bul týraly BUU-nyń bas komıssarynyń okkýpatsııalanǵan palestınalyq aýmaqtar jónindegi ókili Adjıt Sýngaı «Anadolý» agenttiginiń tilshisine bergen suhbatynda aıtty. Suhbat Baspasóz bostandyǵynyń dúnıejúzilik kúnine (3 mamyr) oraı júrgizilgen.
BUU ókili qazirgi tańda palestınalyq anklav – álemdegi buqaralyq aqparat quraldary qyzmetkerleri úshin eń qaýipti aımaqtardyń biri ekenin atap ótti.
Agenttikke suhbat bergen Sýngaı Gaza sektorynda, okkýpatsııalanǵan Batys jaǵalaý men basqa palestınalyq aımaqtarda oqıǵalardy jarııalaý úshin jýrnalısterdiń erekshe kúsh jumsap jatqanyn aıtty. «Palestına jýrnalıster odaǵynyń derekterine sáıkes, 2023 jylǵy 7 qazannan beri 210-nan astam palestınalyq tilshi qaza tapqan. Bul ádeıi jasalǵan áreket dep esepteımiz. Muny dáleldeıtin belgiler bar. Olar kásibı mindetterin atqaryp júrip atylǵan», – dedi ol.
Adjıt Sýngaı halyqaralyq quqyqqa sáıkes, qaqtyǵysqa qatysy joq barlyq beıbit turǵyndar, sonyń ishinde jýrnalıster de qorǵalýy tıis ekenin eske saldy. Onyń aıtýynsha, ózi ókili bolyp tabylatyn qurylym qarap shyqqan kóptegen isterde bul qaǵıda buzylǵan.
– Gazada jýrnalıster qasaqana óltirildi degen kúdikpen qaralatyn oqıǵalar áskerı qylmys retinde qarastyrylýy múmkin. Jýrnalısterdiń ólimine qatysty tirkelgen 210-nan astam jaǵdaı muqııat tergelip, kináliler jaýapqa tartylýy tıis, – dedi Sýngaı.
Sondaı-aq ol Gaza sektorynda jýrnalısterdiń qysqa ýaqyt ishinde osynshalyq kóp qaza tapqanyn buryn-sońdy kórmegenin atap ótti.
– Gaza – jýrnalıster úshin álemdegi eń qaýipti aımaqtardyń biri. Kóptegen jýrnalıst qaqtyǵys kezinde nemese óz úılerinde kóz jumady, keı jaǵdaılarda olardyń otbasylary da qaza tabady. Bul – buryn-sońdy bolmaǵan jaǵdaı. Jaralanǵan jýrnalısterdiń naqty sany da bizge belgisiz, – dep túıindedi ol.
BUU ókili kásibı mindetin atqarý kezinde qaza tapqan nemese jaraqat alǵan jýrnalısterdiń otbasylaryna, dostary men jaqyndaryna álem boıynsha nıettestik bildirdi.
Eske sala keteıik, buǵan deıin 2024 jyly álemde 54 jýrnalıst opat bolǵanyn jazǵan edik.