BUU Izraılden Palestınada qonystardyń qurylysyn toqtatýdy talap etti
ASTANA. QazAqparat - Juma, 23 jeltoqsan kúni BUU Qaýipsizdik keńesi Izraılden Palestınada basyp alynǵan aýmaqtardaǵy qonystandyrý qyzmetin tez arada doǵarýyn talap etetin qarar qabyldady. Qujatty BUU Qaýipsizdik keńesine múshe 15 eldiń 14-i qoldady. AQSh delegatsııasy daýys bermedi, dep habarlaıdy Vestı.rý.
Qabyldanǵan qararda atap ótilgendeı, basyp alynǵan aýmaqtarda Izraıldiń qonystardy salýy halyqaralyq quqyqty buzyp, qaqtyǵystardy retke keltirýde kedergi keltiredi. Qujat biraýyzdan qabyldandy, dep habarlaıdy TASS.
Premer Bınıamın Netanıahýdyń resmı ókili Ofır Gendelman Izraıldiń BUU Qaýipsizdik keńesiniń qonystandyrý týraly qararyn oryndamaıtynyn málimdedi.
«BUU QK qararyna Izraıldiń jaýaby: Izraıl BUU-nyń Izraılge qarsy masqara qararyn qabyl almaıdy jáne bul erejeni oryndamaıdy», - dep jazdy ol Twitter-degi paraqshasyna.
1967 jyly Izraıl Iordannyń batys jaǵalaýyn óz baqylaýyna alǵannan keıin, bul aýmaqta 120-ǵa jýyq eldi mekender salyndy. Sonymen qatar, tipti Izraıl bıliginiń pikirinshe, 100-ge jýyq zańsyz eldi mekender qonystandyryldy. Ol jerlerde barlyǵy 600 myńǵa jýyq ızraıldik ómir súrýde.
