BUU: Izraıl blokadasy Gazany «jer betindegi eń ash aımaqqa» aınaldyrdy
ASTANA.KAZINFORM - Palestına anklavynyń árbir turǵyny azyq-túlik qorynyń jetispeýshiliginen ábden ashtyqqa ushyrady, dep habarlaıdy Kazinform agenttiginiń menshikti tilshisi.
Izraıl Gaza sektoryna gýmanıtarlyq kómektiń az ǵana bóligin berýge ruqsat berip otyr. Bul týraly juma kúni BUU gýmanıtarlyq isterdi úılestirý basqarmasynyń ókili Iens Larke málim etti. Ol anklavty «jerdegi eń ashtyqqa ushyraǵan aımaq» dep atady, dep jazdy Reuters.
BUU málimetinshe, Gaza sektorymen shekaraǵa gýmanıtarlyq júk tıelgen 900 júk kóliginiń tek 600-ine ǵana Izraıl shekarasyna jetýge ruqsat etilgen. Biraq odan keıin de, Larkeniń aıtýynsha, «bıýrokratııalyq protsedýralar men qaýipsizdik shekteýleri» Gazanyń ózine kómek jetkizýdi is júzinde múmkin emes etedi.
- Bar bolǵany un ákele aldyq. Al un jeýge daıyn taǵam emes. Ony pisirý kerek. Gaz, otyn nemese tamaq pisiretin jabdyq joq jaǵdaıda bul múmkin emes, - dedi Larke Jenevadaǵy brıfıngte.
Onyń aıtýynsha, Gaza sektory túgeldeı ashtyqqa ushyraý qaýpinde tur.
Halyqaralyq Qyzyl Krest jáne Qyzyl Jarty Aı komıtetiniń ókili Tommaso della Longa anklavtaǵy medıtsınalyq mekemelerdiń jartysy jumys istemeıtinin atap ótti. Oǵan janar-jaǵarmaı tapshylyǵy, sondaı-aq ómirlik qajetti qural-jabdyqtar men dári-dármektiń jetispeýi sebep.
Halyqaralyq uıymdar Izraıldi Gaza sektoryna gýmanıtarlyq kómektiń qaýipsiz jáne kedergisiz jetýin qamtamasyz etýge shaqyrýdy jalǵastyryp jatyr. BUU ókilderiniń aıtýynsha, jerdegi jaǵdaı tez nasharlap, aýqymdy gýmanıtarlyq apat qaýpi barǵan saıyn shyndyqqa aınalyp jatyr.
Aıta keteıik, jaqynda ǵana anklavta AQSh-tyń qoldaýymen Izraıl qurǵan Gaza gýmanıtarlyq qorynyń jańa taratý ortalyǵy jumys isteı bastady. Onyń maqsaty – gýmanıtarlyq kómektiń HAMAS-tyń qolyna túsýine jol bermeý.
Biraq anklavtaǵy kómekti taratý mehanızmi BUU men halyqaralyq gýmanıtarlyq uıymdar tarapynan synǵa ushyrap, qoldaýdan bas tartty. Bólýdiń alǵashqy kúnderi palestınalyqtar arasynda qurbandar men jaraqat alǵandar boldy.
Bir kún buryn Izraıl bıligi HAMAS jetekshisiniń joıylǵany týraly burynǵy aqparatty jarııa túrde rastady.