BUU Izraıl áskerı qylmys jasady dep kúdiktenýde
ASTANA. QazAqparat - BUU-nyń adam quqyqtary jónindegi joǵary komıssary Navı Pıllaı Izraıl armııasynyń Gaza sektoryndaǵy sodyrlarǵa qarsy aýqymdy operatsııa júrgizý arqyly sońǵy 2 apta ishinde áskerı qylmys jasaǵandyǵyn joqqa shyǵarmaıdy, dep habarlady sheteldik BAQ.
Pıllaıdyń sózine qaraǵanda, BUU sarapshylary Izraıldiń beıbit halyqty qorǵaý úshin Gaza sektoryna shabýyldaý sharalaryn qabyldaǵandyǵyna kúdik keltirýde. «Ótken aptada Gazadaǵy jaǵajaıda 7 balanyń ólimi ızraıldik áskerılerdiń kinásin qýattaıtyn aıǵaq bolýy múmkin», - dedi ol.
Buǵan qosa, ol HAMAS tarabynyń beıbit ızraıldikterdiń ajalyna sebepker bolǵan zymyran soqqysyn aıyptap otyr.
Al Izraıldiń BUU janyndaǵy ókili joǵary komıssardyń bul sózin «jete oılastyrylmaǵan málimdeme» dep baǵalaýda. Onyń sózine qaraǵanda, Izraıl óz aýmaǵyn qorǵaý maqsatynda áreket jasaýda.
