BUU Indonezııaǵa 50,5 mln dollar kómek bermek

ASTANA. QazAqparat - BUU Indonezııadaǵy tabıǵat apatynan zardap shekkenderge kómek kórsetetin jospar ázirledi. Jospardyń jalpy quny 50,5 mln dollar, dep habarlaıdy QazAqparat uıymnyń jańalyqtar saıtyna silteme jasap.

Jarııa etilgen kómek jospary 191 myń adamǵa úsh aı boıy úzdiksiz kómek kórsetýdi kózdeıdi. Atalǵan jospar Indonezııa úkimetimen birlesip ázirlengen. Bul týraly Jenevada ótken jıynda BUU gýmanıtarlyq máseleler boıynsha basqarmasynyń ókili Iens Lerke aıtty.

Aıta keteıik, 28 qyrkúıek, juma kúni Indonezııanyń Ortalyq Sýlavesı provıntsııasynda eki ret jer silkindi. Onyń bireýinde jer silkinisiniń qýaty 7,4 balǵa jetti. Jer silkinisinen keıin provıntsııanyń ortalyǵy sanalatyn Palý qalasynda bıiktigi 2 metrlik kúshti tsýnamı bastaldy. 

Osy oqıǵaǵa baılanysty Memleket basshysy Indonezııa Respýblıkasynyń Prezıdenti Djoko Vıdodoǵa kóńil aıtý jedelhatyn joldady.

Jer silkinisi men tsýnamı saldarynan qaza tapqandar sany 1,2 myń adamnan asty. Sońǵy derekterge qaraǵanda, qaza tasqandar sany 1 581 adamǵa jetip, 2 500 adam jaraqat alǵan.