BUU: Halyqaralyq turaqtylyq úshin shuǵyl áreket kerek

ASTANA. KAZINFORM — Birikken Ulttar Uıymynyń Adam quqyqtary jónindegi joǵarǵy komıssary Folker Tıýrk BUU Adam quqyqtary jónindegi keńesinde sóz sóılep, álemde kóptegen qaqtyǵystar oryn alyp, beıbit turǵyndar aýyr zardap shegip jatqanyn jáne gýmanıtarlyq daǵdarystar kúsheıip kele jatqanyn atap ótti.

БҰҰ: Халықаралық тұрақтылық үшін шұғыл әрекет керек
Фото: news.un.org

Ol halyqaralyq qaýymdastyqty jedel sharalar qabyldaýǵa, beıbit protsesterdi ilgeriletýge jáne jahandyq tártiptiń odan ári quldyraýyna jol bermeýge shaqyrdy.

Tıýrktiń aıtýynsha, birqatar qaqtyǵys aımaqtarynda jalǵasyp jatqan soǵys kóptegen adamnyń ómirin qıyp, gýmanıtarlyq kómektiń jetýine kedergi keltirýde jáne mıllıondaǵan adam bosqynǵa aınalǵan.

Ol ásirese Sýdan, Ýkraına, Gaza sektory jáne Kongo Demokratııalyq Respýblıkasyndaǵy shıelenisken jaǵdaıǵa alańdaýshylyq bildirip, álem elderin qaqtyǵysýshy taraptarǵa qysym jasap, saıası sheshimder qabyldaýǵa yqpal etýge shaqyrdy.

Sonymen qatar, ol tehnologııalyq alpaýyt kompanııalardyń álemdik saıasatqa yqpaly kúsheıip kele jatqanyn atap ótip, olardyń aqparatty manıpýlıatsııalaý arqyly qoǵamnyń erkindigine qaýip tóndirýi múmkin ekenin eskertti.

Osyǵan baılanysty, Tıýrk úkimetterdi tehnologııalardy retteý sharalaryn kúsheıtip, negizgi quqyqtardyń buzylýyna jol bermeýge shaqyrdy.

Tıýrk adam quqyqtarynyń jahandyq turaqtylyqty qamtamasyz etýdegi mańyzdylyǵyn atap ótip, barlyq memleketterdiń ózara yntymaqtastyq ornatyp, beıbitshilikti qoldap, álemniń qaýipsiz ári ádiletti bolashaǵyn qalyptastyrýǵa kúsh salýy qajettigin aıtty.

Сейчас читают