BUU Halyqaralyq sotynyń 5 sýdıasy jańadan saılandy
ASTANA. KAZINFORM — Seısenbi, 3 qarasha kúni BUU Qaýipsizdik Keńesi men Bas Assambleıasy Halyqaralyq sottyń (HS) otstavkaǵa ketken 5 sýdıasynyń ornyna bes zańgerdi saılady, dep habarlaıdy Xinhua.
Jańa sýdıalar qatarynda Ulybrıtanııadan Dapo Akande, Frantsııadan Fransýa Alabrýn, Iordanııadan Mahmýd Daıfallah Hmýd, Sıngapýrdan Rena Lı jáne Kenııadan Fıbı Okova bar.
Saılanǵan bes úmitkerdiń ekeýi — Mahmýd Daıfallah Hmýd pen Fıbı Okova qazirgi sýdıalar quramynda bolǵan jáne qaıta saılandy. Olardyń barlyǵy 2027 jylǵy 6 aqpannan bastap 9 jyl qyzmet atqarady.
Hmýd pen Okova buǵan deıin de bos qalǵan sýdıa orynyna saılanǵan edi. Hmýd 2025 jylǵy mamyrda 2027 jylǵy 5 aqpanǵa deıingi merzimge taǵaıyndaldy. Ol Lıvannyń premer-mınıstri bolýyna baılanysty Halyqaralyq sottaǵy qyzmetinen ketken Naýaf Salamnyń ornyna keldi. Al Okova 2025 jylǵy qarashada otstavkaǵa ketken Somalı ókili Abdýlkavı Ahmed ıÝsýftyń ornyna saılandy.
BUU-nyń basty sot organy sanalatyn Halyqaralyq sot jarǵysyna sáıkes, sýdıalar Qaýipsizdik Keńesi men Bas Assambleıada jasyryn daýys berý arqyly saılanady. Úmitker eki organda da daýystyń basym bóligin jınaýy kerek. Daýys berý bir mezgilde, biraq bólek ótkiziledi.
Bıyl túpkilikti sheshim qabyldaý úshin Bas Assambleıa men Qaýipsizdik Keńesinde úsh kezeńnen daýys berýge týra keldi.
Gaaga qalasynda ornalasqan BUU Halyqaralyq soty 15 sýdıadan turady. Olar 9 jyl merzimge saılanady. Sot jumysynyń sabaqtastyǵyn saqtaý maqsatynda ár úsh jyl saıyn 5 sýdıa qaıta saılanady. Sýdıalar ekinshi merzimge de saılana alady. Eger sýdıa ókilettik merzimi aıaqtalmaı qaıtys bolsa nemese otstavkaǵa ketse, onyń qalǵan merzimine jańa sýdıany saılaý úshin kezekten tys daýys berý ótkiziledi.
Halyqaralyq sot quramynda 15 túrli memlekettiń ókili bolýy tıis.
Aıta keteıik, BUU Qaýipsizdik Keńesi Lıvııaǵa qoldaý kórsetý jónindegi BUU mıssııasynyń mandatyn 2027 jylǵy 31 qazanǵa deıin uzartty.
