BUU gýmanıtarlyq uıymynyń 9 qyzmetkeri 7 qazanda Izraılge jasalǵan shabýylǵa qatysy bolýy múmkin
ASTANA. KAZINFORM—BUU-nyń Іshki baqylaý qyzmetteri basqarmasynyń tergeýine sáıkes, BUU-nyń Taıaý Shyǵystaǵy palestınalyq bosqyndarǵa kómek jónindegi agenttiginiń (UNRWA) toǵyz qyzmetkeri ótken jyldyń 7 qazanynda Izraılge jasalǵan shabýylǵa qatysy bolýy múmkin. Bul týraly NBC News arnasyna habarlaıdy.
HAMAS-tyń 2023 jyldyń 7 qazanynda Izraılge jasaǵan shabýylynan 1200 adam qaza taýyp, 240-qa jýyǵy kepilge alyndy. Izraıl HAMAS-qa soǵys jarııalady jáne Gaza sektorynda 40 myńnan astam adamdy óltirdi, deıdi sheneýnikter.
Qańtar aıynda Izraıl UNRWA-nyń kem degende 12 qyzmetkeriniń 7 qazandaǵy shabýylǵa qatysy baryn aıtyp, kóptegen elderdi, sonyń ishinde AQSh-ty gýmanıtarlyq uıymdy qarjylandyrýdy toqtatýǵa májbúr etti.
UNRWA komıssary general Fılıpp Latstsarını baspasóz málimdemesinde UNRWA qyzmetkerlerine qatysty aıyptaýlardyń agenttik nazaryna jetkizilgenin jáne olardyń kelisimsharttary buzylǵanyn aıtty.
Birikken Ulttar Uıymynyń Bas hatshysy Antonıý Gýterrıshtiń ótinishi boıynsha Іshki baqylaý basqarmasy Gazadaǵy UNRWA-nyń 19 qyzmetkerine shabýylǵa qatysy bar degen kúdikpen tergeý júrgizdi.
Bir jaǵdaıda qyzmetkerdiń shabýylǵa qatysy baryn aıqyndaıtyn aıǵaq tabylmady.
Toǵyz jaǵdaıda dálelder «qyzmetkerlerdiń qatysy baryn dáleldeý úshin jetkiliksiz» boldy.
Qalǵan toǵyz jaǵdaıda dálelder UNRWA qyzmetkerleriniń 7 qazandaǵy shabýyldarǵa qatysy bolýy múmkin ekenin kórsetti.
UNRWA-1949 jyly Batys jaǵalaýdaǵy, Gaza, Iordanııa, Lıvan jáne Sırııadaǵy palestınalyq bosqyndarǵa kómek kórsetý jáne qorǵaý úshin qurylǵan BUU uıymy.
Agenttiktiń málimetinshe, óńirde 30 myńǵa jýyq qyzmetker jumys isteıdi, onyń ishinde 13 myńy Gaza sektorynda.
