BUU: Global Sumud flotılııasyna jasalǵan shabýyl aqylǵa qonymsyz
ASTANA. KAZINFORM — Gazaǵa gýmanıtarlyq kómek jetkizýge bet alǵan halyqaralyq Global Sumud flotılııasyna Izraıl tarapynan jasalǵan shabýyl aqylǵa syımaıtyn áreket, dep jazdy Anadoly.
Bul týraly BUU-nyń Adam quqyqtary jónindegi joǵarǵy komıssarynyń ókili Tamın Al-Hıtan flotılııaǵa Grekııa jaýapty izdeý-qutqarý (SAR) aımaǵynda ushqyshsyz ushaqtar (BPLA) arqyly jasalǵan shabýyldarǵa pikir bildire otyryp málimdedi.
— Gazada ashtyq pen azyq-túlik jetispeýshiliginen zardap shegip jatqan júzdegen myń adamǵa kómek pen qoldaý jetkizýge tyrysqandarǵa baǵyttalǵan shabýyldar men qaýip-qaterler aqylǵa qonymsyz, — delingen málimdemede.
Al-Hıtan flotılııaǵa qarsy ushqyshsyz ushaqtar men basqa da quraldar arqyly jasalǵan shabýyldar men qýdalaýlarǵa qatysty táýelsiz, beıtarap jáne jan-jaqty tergeý júrgizý qajettigin atap ótti. Ol mundaı shabýyldardy toqtatyp, quqyq buzǵandardy jaýapqa tartý kerek ekenin qadap aıtty.
Sondaı-aq, Al-Hıtan Izraıldi okkýpatsııalyq derjava retinde Gaza halqyna azyq-túlik pen medıtsınalyq quraldar jetkizý úshin barlyq múmkindikterdi paıdalanýǵa, ne bolmasa beıtarap gýmanıtarlyq baǵdarlamalardyń kedergisiz ári jedel júzege asyrylýyna jaǵdaı jasaýǵa shaqyrdy.
Onyń aıtýynsha, BUU-nyń Adam quqyqtary jónindegi joǵarǵy komıssary Folker Tıýrk Izraıldi Gazaǵa qoıylǵan blokadany shuǵyl túrde alyp tastaýǵa jáne adam ómiri úshin mańyzdy materıaldardyń barlyq múmkin joldarmen jetkizilýine ruqsat berýge shaqyrdy.
Grekııadan Gazaǵa gýmanıtarlyq kómek jetkizýge shyqqan Global Sumud flotılııasy Grekııa jaýapty aýmaqta ushqyshsyz ushaqtar arqyly shabýylǵa ushyrady.