BUU Gazany buqaralyq aqparat quraldary úshin eń qaýipti aımaq dep atady

ASTANA. KAZINFORM – Álemde jýrnalıster óliminiń 90 paıyzy ashylmaǵan kúıi qalyp otyr. Al Gaza jýrnalıster úshin tarıhtaǵy áskerı qaqtyǵystar arasynda eń qaýiptisi bolyp otyr.

Bul týraly tilshilerge BUU Bas hatshysynyń resmı ókili Stefan Dıýjarrık aptalyq brıfıng barysynda málim etti, dep habarlaıdy BELTA.

2 qarashada Jýrnalısterge qarsy qylmystar úshin jazasyzdyqty toqtatýdyń halyqaralyq kúni atalyp ótýine baılanysty Dıýjarrık álem boıynsha BAQ ókilderi betpe-bet kelip jatatyn jerler, ásirese Gazadaǵy qaýipter týraly eskertti.

- Jýrnalıster ólimimen baılanysty 10 qylmystyń 9-y ashylmaı qalyp jatady. Gaza barlyq qaqtyǵys aımaqtarynyń ishinde jýrnalıster úshin eń qaýiptisi bolyp qalyp otyr, - dedi ol.

Dıýjarrık BUU Bas hatshysy Antonıý Gýterrıshtiń jazalanbaý baspasóz bostandyǵy men demokratııanyń ózine keltirilgen zalal ekenin aıtyp, jýrnalısterdiń ólimine qatysty tergeýdi táýelsiz ári ádil júrgizýge shaqyrǵanyn jetkizdi.

-Tilshiler únsiz qalǵan jerde bárimizdiń daýsymyz shyqpaıdy,-dedi ol.

Izraılge Gazaǵa jasaǵan eki jyldyq shabýyldary barysynda 250 jýrnalıst óltirildi degen aıyp taǵylyp otyr. Olardyń kópshiligine ózderiniń kásibı mindetterin atqarý barysynda ádeıi qastandyq jasalǵan.

Aıta keteıik, Túrkııa prezıdenti Rejep Taıyp Erdoǵan Ystanbulda 31 qazan kúni ótken TRT World halyqaralyq forýmynda sóılegen sózinde buqaralyq aqparat quralynyń 270 qyzmetkeri ómirin qaýipge tige otyryp, álemge onda ne bolyp jatqanyn oqıǵa ornynan kórsetýge tyrysqanyn aıtty.

- Alaıda olar ótirikke negizdelgen Izraıl saıasatynyń kesirinen óltirildi, - dedi.