BUU: Gazadaǵy soǵys saldarynan mıllıonnan astam adam bosqynǵa aınaldy

ASTANA. KAZINFORM — Naýryz aıynyń ortasynda Izraıl men Hamas arasyndaǵy atysty toqtatý kelisimi buzylǵaly Gaza sektorynda mıllıonnan astam adam bosqynǵa aınaldy, dep jazdy REPORT.AZ.

BUU-nyń gýmanıtarlyq isterdi úılestirý basqarmasynyń málimetinshe, tek qyrkúıektiń ózinde Gaza qalasynyń 250 myńnan astam turǵyny úıleri men baspanalaryn tastap ketýge májbúr bolǵan.

— Sandar jyldam ósip keledi: tek sońǵy aıda 200 myńǵa jýyq adam Gazanyń soltústiginen Gazanyń ońtústigine kóshirildi. Onyń ishinde jeksenbiden beri 56 myń adam. Qatań shekteýlerge qaramastan, BUU men seriktester zardap shekken anklav turǵyndaryna ómirlik qoldaý kórsetý úshin qoldan kelgenniń bárin jasaýda, — delingen habarlamada.

OCHA qazirgi ýaqytta Gaza turǵyndary alatyn kómek olardyń úlken qajettilikterinen áldeqaıda az ekenin atap ótti. Ash qalǵan halyqqa qoldaý kórsetý júıeli túrde buǵattalyp, apta saıyn jańa shekteýler engiziledi.

— Izraıl bıligi sonymen qatar keıbir azyq-túlik ónimderin, mysaly, jerjańǵaq maıyn «sándi taýarlar» sanatyna jatqyzyp, olardyń ımportyna tyıym salyp, buryn satyp alynǵan úlken kólemdegi gýmanıtarlyq kómekti anklavtan tys jerde qaldyrdy. Gazadaǵy gýmanıtarlyq kólikterge de tosqaýyl qoıyldy, — dep atap ótti uıym.

Aıta keteıik, buǵan deıin halyqaralyq gýmanıtarlyq uıymdar Izraıldiń Gazaǵa shabýylyn toqtatýǵa shaqyrǵanyn jazǵan bolatynbyz.