BUU: Gazadaǵy ashtyqty toqtatý úshin kún saıyn júzdegen júk kóligin jetkizý kerek

ASTANA. KAZINFORM Birikken Ulttar Uıymynyń Gýmanıtarlyq máselelerdi úılestirý basqarmasynyń ókili Iens Lerke Gaza sektoryndaǵy jaǵdaıdyń asa aýyr ekenin aıtyp, mıllıondaǵan adamdy qutqarý úshin kún saıyn júzdegen gýmanıtarlyq kólik jiberilýi kerek ekenin málimdedi, dep habarlaıdy Anadoly.

Bul týraly ol Jenevadaǵy BUU bólimshesinde ótken apta saıynǵy baspasóz máslıhatynda aıtty.

— Gazada eń qajetti zattardyń ózi qatty jetispeıdi, adamdar kún saıyn ashtyqtan ólip jatyr. Bul – buryn-sońdy bolmaǵan apat. Kún saıyn júzdegen júk kóligi qajet. Aptalar emes – aılar, bálkim jyldar boıy. Biz asharshylyq shegine jettik. Bul jaǵdaı bir túnde sheshilmeıdi, — dedi Lerke.

Gýmanıtarlyq kómek jetkiliksiz

Lerkeniń aıtýynsha, sońǵy ýaqytta jetkizilgen azǵantaı gýmanıtarlyq kómekti atap ótýge esh negiz joq.

— Bul maqtaýǵa turmaıdy. Bizde myńdaǵan tonna gýmanıtarlyq júk bar, onyń ishinde donorlar qarjylandyrǵan azyq-túlik te bar, ol Gaza shekarasynda kútip tur. Bul zattar tegin túrde muqtaj jandarǵa jetkizilýi tıis. Bul – bizdiń mindetimiz. Biraq bizge qajetti jaǵdaı da, qoldaý da jasalmaı otyr, — dedi ol.

Sonymen qatar Lerke tek gýmanıtarlyq júkpen shektelýge bolmaıtynyn, Gazaǵa kommertsııalyq taýarlardyń da kirýine múmkindik berilýi tıis ekenin atap ótti.

Blokada, asharshylyq jáne ólim

Gaza sektory Izraıldiń qatań blokadasynda jáne kúndelikti áskerı shabýyldar astynda qaldy. Azyq-túlik, aýyz sý, dári-dármek pen gıgıenalyq quraldar jetispeıdi. Balalar arasyndaǵy ólim-jitim kún saıyn ósip jatyr.

Jergilikti jáne halyqaralyq derekkózder Izraıldiń ashtyq pen shóldi qarý retinde ádeıi paıdalanyp otyrǵanyn habarlaıdy. Sonymen birge Gaza aýmaǵynyń 88%-y joıylǵan dep baǵalanyp otyr.

Izraıl áskeri bosqyndardyń ýaqytsha turyp jatqan jerlerin — shatyrly lagerler, mektepter jáne ózge de azamattyq nysandardy atqylaýdy jalǵastyrýda. Adamdar úılerin birneshe ret tastap, antısanıtarlyq jaǵdaıda ómir súrip jatyr. Mundaı ortada juqpaly aýrýlar keńinen taralýda.

Qaıǵyly statıstıka

2023 jyldyń 7 qazanynan beri Izraıldiń áskerı shabýyldary saldarynan Gazada:

keminde 60 933 palestınalyq qaza tapty,

150 027 adam jaraqat aldy,

2,3 mıllıon turǵynnyń ishinen 2 mıllıonnan astamy bosqynǵa aınaldy.

Aıta ketelik Gaza sektoryna bes elden gýmanıtarlyq kómek jetkizilgen edi.