BUU: Gazada dári-dármek tapshylyǵy men kemirgishterdiń kóbeıýine baılanysty teri ınfektsııalary órship ketti
ASTANA. KAZINFORM — BAPOR palestınalyq eksklavtaǵy sanıtarlyq-gıgıenalyq jaǵdaıdyń nasharlaýyna nazar aýdardy. Bul týraly Anadoly agenttigi jazdy.
BUU-nyń Taıaý Shyǵystaǵy palestınalyq bosqyndarǵa kómek kórsetý jáne jumystardy uıymdastyrý agenttigi (BAPOR) Izraıl tarapynan gýmanıtarlyq kómektiń jetkizilýine qoıylǵan shekteýler saldarynan týyndaǵan dári-dármek tapshylyǵy men kemirgishterdiń kóbeıýi aıasynda Gaza sektorynda teri ınfektsııalarynyń kúrt artqanyn habarlady. Bul týraly BAPOR-dyń amerıkalyq X áleýmettik jelisindegi jarııalanymynda aıtylǵan.
BAPOR palestınalyq eksklavtaǵy sanıtarlyq-gıgıenalyq jaǵdaıdyń nasharlaǵanyn atap ótti.
— Gaza turǵyndary tyshqan, egeýquıryq pen bıt, búrge sondaı-aq kenelerdiń kóbeıýinen týyndaıtyn teri ınfektsııalarynan jıi zardap shegip otyr, — delingen habarlamada.
Aıta ketilgendeı, medıtsınalyq brıgadalar tirkelgen myńdaǵan jaǵdaılardyń shamamen 40%-yna ǵana kómek kórsete alǵan. Sonymen qatar, mundaı aýrýlar qalypty jaǵdaıda ońaı emdeletini, alaıda dári-dármek tapshylyǵy qajetti em júrgizýge múmkindik bermeı otyrǵany atap ótildi.
BAPOR málimetinshe, gýmanıtarlyq kómektiń jetkizilýine kedergiler saldarynan Gaza sektorynda negizgi dári-dármekterdiń ótkir tapshylyǵy baıqalady, bul kóptegen naýqastardy, ásirese balalardy, qajetti emnen aıyryp otyr.
Agenttik Gazada gýmanıtarlyq kómektiń keń kólemde jetkizilýine ruqsat berýge shaqyryp, shekteýlerdiń saqtalýy sanıtarlyq-epıdemıologııalyq jaǵdaı men gýmanıtarlyq ahýaldyń odan ári nasharlaýyna ákelýi múmkin ekenin eskertti.
DDU málimdemesi
Sonymen qatar, Dúnıejúzilik densaýlyq saqtaý uıymy (DDU) 25 sáýirdegi málimdemesinde jyl basynan beri Gaza sektorynda kemirgishter men syrtqy parazıtterden týyndaǵan 17 myńnan astam aýrý jaǵdaıy tirkelgenin habarlady.
Uıymda «Gaza sektoryndaǵy úmitsiz ári qaýipti jaǵdaılar jaǵdaıdy jaqsartý jónindegi áreketterge kedergi keltirýde» dep atap ótip, otbasylar arasynda ınfektsııa deńgeıiniń óskenin jetkizdi.
2006 jyldan beri Izraıl blokadada ustap otyrǵan Gaza sektoryna jappaı bombalaý 2023 jyldyń qazan aıynda bastaldy, sonyń saldarynan ondaǵan myń palestınalyq qaza taýyp, halyqtyń edáýir bóligi úılerin tastap ketýge májbúr boldy.
Gaza bıliginiń málimetinshe, 2025 jyldyń qazanyna qaraı Izraıl armııasynyń eki jyl boıy jalǵasqan shabýyldary saldarynan shamamen 2,3 mln adam turatyn eksklavtaǵy turǵyn úı qorynyń 90%-ǵa jýyǵy qıraǵan.
Aýqymdy qıraýlardyń nátıjesinde 1,5 mln-nan astam palestınalyq shatyrly lagerler men ýaqytsha ornalastyrý ortalyqtarynda panalaýǵa májbúr bolyp, káriz, sý jáne elektr energııasyna qol jetkize almaı otyr.
Tel-Avıv bıligi atysty toqtatý rejımi engizilgenine alty aı ótkenine qaramastan, Gazany qatań blokadada ustap, 2 mln-nan astam palestınalyqty negizgi qyzmetter men ómirlik mańyzdy resýrstardan aıyrýdy jalǵastyryp otyr.
BAPOR komandalary qonys aýdarǵan adamdar turatyn lagerler men baspanalarda tazalaý jáne dezınfektsııa jumystaryn júrgizip, densaýlyqqa tónetin qaýip-qaterdi azaıtýǵa tyrysýda. Alaıda ınfraqurylymnyń qıraýyna baılanysty zııankesterdiń taralýyn tolyq toqtatý múmkin bolmaı otyr.
Aıta keteıik, buǵan deıin Gaza sektoryndaǵy densaýlyq saqtaý júıesi kúıreý aldynda turǵanyn jazdyq.
