BUU: Gazada 50 myń júkti jáne bala emizetin áıel birneshe kúnnen beri ash otyr

ASTANA. KAZINFORM – Birikken Ulttar Uıymynyń Halyqty ornalastyrý qory (UNFPA) Gaza sektorynda 50 myńǵa jýyq júkti jáne bala emizetin áıel birneshe kúnnen beri tamaqqa qol jetkize almaı júrgenin jetkizdi, dep habarlaıdy Anadolu.

UNFPA-nyń Arab elderi boıynsha aımaqtyq keńsesi málimdeme jasap, Gazadaǵy júkti áıelder, analar men sábılerdiń jaǵdaıy óte nashar ekenin jetkizdi.

– Gaza sektoryndaǵy júkti jáne bala emizetin 50 myń áıel birneshe kúnnen beri tamaq ishpeı otyr. Náresteler tym erte nemese shala týylyp jatyr, - delingen habarlamada.

Málimdemede analar arasyndaǵy durys tamaqtanbaý kúrdeli másele bolyp otyrǵany, sondaı-aq nárestelerge beretin sút qospalary taýsylǵany aıtylǵan.

- Gaza sektoryndaǵy jańa týǵan nárestelerge ólim nemese ómir boıy asqyný qaýpi tónip tur. Buǵan jol bermeýge bolady — gýmanıtarlyq kómekke qoljetimdilikti ashyńyzdar, - dep málimdedi uıym.

Naýryz aıynan bastap Gaza sektoryndaǵy shekara ótkelderi arqyly gýmanıtarlyq kómek jetkizýge tosqaýyl qoıǵan Izraıl shabýyldary aımaqta aýqymdy gýmanıtarlyq apat týdyrdy.

Izraıl armııasy azamattyq ınfraqurylym nysandaryna jáne qonys aýdarǵan palestınalyqtarǵa júıeli túrde soqqy berip jatyr. Sondaı-aq AQSh pen Izraıldiń qoldaýymen Gaza gýmanıtarlyq kómek qorynyń kómegimen qurylǵan aımaqtarǵa bet alǵan, ashtyqtan zardap shekken gazalyqtarǵa shabýyl jasalǵany týraly habarlandy.

27 mamyrdan bastap «ólim tuzaǵy» retinde paıdalanylatyn kómek taratý ortalyqtarynyń janynda Izraıl shabýylynan qaza tapqandar sany 766-ǵa, al jaralanǵandar 5044-ke jetti.

Izraıl men HAMAS Gazadaǵy atysty toqtatý boıynsha kelisimge kele bastaǵanyn jazǵan edik.