BUU: Gazada 2 mıllıonǵa jýyq adam baspanaǵa muqtaj

ASTANA. KAZINFORM — Gazada 1,7 mıllıonnan astam adam bosqynǵa aınalyp, 1,4 mıllıon turǵyn azyq-túlik tapshylyǵyn kórip otyr. Al 2 mıllıonǵa jýyq adam baspanaǵa muqtaj. Bul týraly BUU-nyń Halyqaralyq kóshi-qon uıymy (HKU) men Dúnıejúzilik azyq-túlik baǵdarlamasy (DAB) málimdedi, dep Anadoly agenttigi jazdy.

BUU: Gazada 2 mıllıonǵa jýyq adam baspanaǵa muqtaj
Foto: Anadoly

Uıym ókilderi Jenevadaǵy brıfıngte Gaza sektoryndaǵy gýmanıtarlyq jaǵdaı týraly baıandama usynyp, aldaǵy qys mezgili turǵyndardyń jaǵdaıyn odan ári qıyndatýy múmkin ekenin eskertti.

Baıandamaǵa sáıkes, gýmanıtarlyq kómek jetkiliksiz, al ony jetkizýge qajetti qarjy men aımaqqa kirý múmkindigi shekteýli. Qarasha aıynan beri keminde 40 myń ýaqytsha baspana búlingen nemese qıraǵan. Sonymen qatar qonys aýdarǵandar turatyn aýdandardyń jartysynan astamyna sý basý qaýpi tónip tur.

Qazir Gazadaǵy halyqtyń úshten ekisi azyq-túliktiń asa tapshylyǵyn sezinýde. Qarjy jetispegendikten, BUU-nyń Dúnıejúzilik azyq-túlik baǵdarlamasy kómekti qysqartýǵa májbúr bolǵan. Endi turǵyndarǵa ystyq tamaq kún saıyn emes, kúnara beriledi. Azyq-túlik jıyntyqtary men aqshalaı kómek kólemi de shektelgen.

BUU málimetinshe, Gaza halqynyń 80 paıyzy jumyssyz. Gaz ben otynnyń tapshylyǵy jáne qymbattaýy saldarynan keıbir otbasylar tamaq pisirý úshin qoqys jaǵýǵa májbúr.

Halyqaralyq kóshi-qon uıymyna baspanamen qamtamasyz etý baǵdarlamalaryn jalǵastyrý úshin 173 mıllıon dollar qajet. Bul qarajat shatyrlar, brezent, kórpeler men ýaqytsha baspanalardy jóndeýge arnalǵan materıaldar satyp alýǵa jumsalmaq.

Al Dúnıejúzilik azyq-túlik baǵdarlamasy aldaǵy alty aıda Palestına aýmaǵyndaǵy 2 mıllıon adamǵa kómek kórsetý úshin 436 mıllıon dollar qarjy tapshy ekenin málimdedi.

BUU-nyń boljamynsha, gýmanıtarlyq kómek jalǵaspasa, 2026 jyldyń sońyna qaraı Gaza halqynyń 90 paıyzyna teń 1,9 mıllıon adam azyq-túliktiń ótkir tapshylyǵyna tap bolýy múmkin.

BUU ókilderi qys mezgilinde turǵyndarǵa qaýipsiz baspana, jyly kıim, kórpe jáne tamaq daıyndaýǵa qajetti otyn shuǵyl kerek ekenin atap ótti. Olar gýmanıtarlyq kómekti ulǵaıtyp, Gaza sektoryna turaqty ári kedergisiz qoljetimdilikti qamtamasyz etýge shaqyrdy.