BUU: Sońǵy 18 aıda Gaza eń aýyr gýmanıtarlyq jaǵdaıǵa tap boldy
ASTANA. KAZINFORM – Izraıl qorshaýynda turǵan eksklav 2 naýryzdan beri gýmanıtarlyq kómek almaǵan. Bul týraly Anadoly habarlady.
2023 jylǵy 7 qazannan beri Gaza sektory eń aýyr gýmanıtarlyq daǵdarysty bastan keshirip otyr. Bul jaǵdaı Izraıl engizgen tolyq qorshaýǵa baılanysty shıelenise tústi — 2 naýryzda barlyq shekara ótkelderi jabyldy.
BUU-nyń Gýmanıtarlyq máselelerdi úılestirý basqarmasynyń málimdemesinde aıtylǵandaı, osy bir jarym aı ishinde eksklavqa eshqandaı gýmanıtarlyq kómek jetkizilmegen. Azyq-túlikke, aýyz sý men medıtsınalyq kómekke asa muqtaj beıbit halyqtyń jaǵdaıy kómekke qol jetkize almaý saldarynan odan ári nasharlap otyr.
Uıym bul jaǵdaıdy Izraıldiń Palestına aımaǵyna qarsy jappaı shabýyldaryn bastaǵannan bergi eń uzaq gýmanıtarlyq kómek úzilisi ekenin atap ótti.
— Bul — sońǵy 18 aıdaǵy eń aýyr gýmanıtarlyq jaǵdaı bolýy múmkin, — delingen BUU-nyń Gýmanıtarlyq máselelerdi úılestirý basqarmasynyń málimdemesinde.
Izraıl 2 naýryzda gýmanıtarlyq kómekti tolyǵymen toqtatý týraly sheshim qabyldady. Bul sheshim HAMAS-pen jasalǵan atysty toqtatý jáne tutqyndarmen almasý týraly 42 kúndik kelisimniń alǵashqy kezeńi aıaqtalǵannan keıin qabyldandy.
2024 jylǵy 19 qańtarda kúshine engen ýaqytsha atysty toqtatý rejımine qaramastan, 18 naýryz kúni tańerteń Izraıl áskeri eksklavqa qarsy keń aýqymdy shabýyldaryn qaıta bastady.
Aıta ketelik Netanıahý Gazadaǵy 10 ızraıldik tutqyndy bosatýǵa nıetti.