BUU Gaza sektorynda 1 mıllıon turǵynǵa gýmanıtarlyq kómek úlestirdi
ASTANA. KAZINFORM — BUU Dúnıejúzilik azyq-túlik baǵdarlamasynyń (DBAB) qyzmetkerleri atysty toqtatý týraly kelisim kúshine engen kúnnen beri Gaza sektorynda shamamen 1 mıllıon adamǵa azyq-túlik jıyntyǵyn taratty. Alaıda uıym ókilderi mundaı kómek kólemi qazirgi kúrdeli jaǵdaıda jetkiliksiz ekenin málimdedi, dep jazdy Anadoly.
Bul týraly DBAB-tyń Taıaý Shyǵys, Soltústik Afrıka jáne Shyǵys Eýropa boıynsha kommýnıkatsııalar jónindegi aımaqtyq aǵa mamany ári baspasóz hatshysy Abır Etefa men uıymnyń Gaza sektoryndaǵy ókili Nýr Hammad BUU-nyń Jenevadaǵy aptalyq baspasóz konferentsııasynda onlaın formatta habarlady.
Etefanyń aıtýynsha, atysty toqtatý kelisimine qol qoıylǵanyna shamamen bir aı boldy.
— Biz Gaza sektorynda shamamen 1 mıllıon adamǵa azyq-túlik tarattyq. Bul — ashtyqpen kúresýge baǵyttalǵan keshendi operatsııanyń bir bóligi. Biraq kómekti ýáde etilgen deńgeıge deıin keńeıtý úshin bizge kóbirek qoljetimdilik, qosymsha shekara ótkelderin ashý jáne joldardyń ótkizý qabiletin arttyrý qajet, — dedi ol.
Onyń aıtýynsha, kómek taratý áli de shekteýli. DBAB atysty toqtatqannan keıin 1,6 mln adamdy qamtýdy maqsat etken, biraq ázirge 1 mln adamǵa ǵana kómek kórsetildi.
Qazir Gaza boıynsha 44 azyq-túlik taratý pýnkti jumys isteıdi. Sondaı-aq DBAB qoldaý kórsetip otyrǵan 17 naýbaıhana kúnine 700 myń adamdy jańa pisken nanmen qamtamasyz etip otyr.
Etefanyń dereginshe, qazan aıynda 150 myń áıel men bes jasqa deıingi bala mańyzdy taǵamdyq qospalar aldy — bul josparlanǵan kólemniń shamamen jartysy.
— Atysty toqtatqannan keıin júzdegen myń adam Gazanyń soltústigine oraldy, biraq olardyń kóbisi qıraǵan úılerinde turyp jatyr. Azyq-túlikke qol jetkizý áli de kúrdeli. Kóptegen bosqyn otbasylar sektordyń ońtústiginde shatyrlarda turyp, negizgi qajettilikterge zárý, — dedi Etefa.
Onyń aıtýynsha, gýmanıtarlyq kómek pen azdaǵan kommertsııalyq júk jetkizilimine baılanysty qazan aıynyń ortasynda azyq-túlik tutyný deńgeıi sál jaqsarǵanymen, ol áli de qaqtyǵysqa deıingi mejeden áldeqaıda tómen.
Al DBAB ókili Nýr Hammad Gazanyń soltústigine gýmanıtarlyq kómektiń jetkiliksiz ekenin atap ótti.
— Atysty toqtatý úmit uıalatyp edi, biraq turǵyndar áli de belgisizdik pen úreıde ómir súrip jatyr. Bul olardyń psıhologııalyq jaǵdaıyna qatty áser etýde, — dedi ol.
Aıta keteıik, Izraıl Gaza sektorynda atysty toqtatý rejımin taǵy da buzdy.