BUU: Gaza sektoryn qalpyna keltirýge ondaǵan jyldar qajet bolýy múmkin

ASTANA. KAZINFORM – Gaza sektoryn qalpyna keltirýge 61 mlrd eýroǵa jýyq qarjy qajet bolady, dep málimdedi BUU joǵary dárejeli ókili. Qalpyna keltirý jumystary qarjylandyrý kólemine baılanysty bolmaq.

Bul týraly DW habarlaıdy.

Gaza sektoryndaǵy atysty toqtatqannan keıin BUU aımaqty qalpyna keltirý jumystaryn múmkindiginshe tez bastaýǵa shaqyrdy.

BUU Damý baǵdarlamasy (PROON) sheńberinde Palestına aýmaqtaryna kómek kórsetý baǵdarlamasynyń arnaıy ókili ıAko Sıllıerstiń 14 qazan, seısenbi kúni Jenevada ótken brıfıngte málimdegenindeı, qalpyna keltirý jumystaryn bastaý úshin qıraǵan qalalardy úıindilerdan tazalap, shamamen 55 mıllıon tonna qurylys qaldyǵyn shyǵarý qajet.

-BUU, Eýropa odaǵy jáne Dúnıejúzilik bank birlesip júrgizgen jedel baǵalaý nátıjesine sáıkes, Gazany qalpyna keltirýge shamamen 70 mıllıard AQSh dollary (shamamen 61 mıllıard eýro) qajet bolady, — dedi Sıllıers.

Onyń aıtýynsha, bul uıymdar tek qırandylardyń kólemin anyqtap qana qoımaı, eń aldymen qaı aımaqtardy qalpyna keltirý qajet ekenin jáne negizgi kúshti qaı baǵytqa shoǵyrlandyrý kerektigin aıqyndaýmen de aınalysady.

«Múmkin barlyq aýmaq tolyq qalpyna keltirilmeıdi», — dedi BUU ókili.

Ol alǵashqy úsh jylda qalpyna keltirý jumystaryna 20 mıllıard dollar (17,3 mıllıard eýro) jumsalatynyn atap ótti.

ıAko Sıllıerstiń aıtýynsha, qalpyna keltirý merzimi belgisiz jáne bul protsess bólinetin qarjy kólemine tikeleı baılanysty bolyp, ondaǵan jylǵa sozylýy múmkin.

Osyǵan deıin Gaza sektorynda atysty toqtatý týraly kelisimge qol qoıylǵany týraly jazǵan edik.