BUU forýmynda memlekettik basqarýdaǵy jasandy ıntellektiniń múmkindikteri talqylandy
ASTANA. KAZINFORM – Tbılısıde ótken BUU Memlekettik qyzmeti forýmy aıasynda «Memlekettik basqarýdaǵy jasandy ıntellekt: tıimdilik pen qoǵamdyq múdde arasyndaǵy tepe-teńdik» taqyrybynda óńiraralyq semınar ótti.
Іs-sharaǵa Ortalyq Azııa, Kavkaz jáne Azııa-Tynyq muhıty óńiriniń 12 elinen kelgen 40-tan astam memlekettik qyzmetshi men sarapshy qatysty.
Semınar barysynda qatysýshylar jasandy ıntellektiniń memlekettik sektordyń tıimdiligin arttyrýdaǵy múmkindikterin, sondaı-aq esep berý, ashyqtyq, ınklıýzıvtilik jáne sheshim qabyldaý kezinde adamnyń jetekshi rólin saqtaý máselelerin talqylady.
Astana memlekettik qyzmet haby Basqarýshy komıtetiniń tóraǵasy Alıhan Baımenov jasandy ıntellektiniń damýy memlekettik basqarýdy jetildirýge jańa múmkindik beretinin aıtty.
«Jasandy ıntellektiniń qarqyndy damýy ashyqtyqty, derekterdi qorǵaýdy, adam quqyqtaryn saqtaýdy jáne tıimdilik pen qoǵamdyq múdde arasyndaǵy tepe-teńdikti qamtamasyz etý máselelerine erekshe nazar aýdarýdy talap etedi. Bul múmkindikter men syn-qaterler halyqaralyq yntymaqtastyq pen tájirıbe almasýdy qajet etedi», – dedi Alıhan Baımenov.
Koreıa Respýblıkasy Іshki ister jáne qaýipsizdik mınıstrligine qarasty JI úkimeti ofısiniń dırektory Djınhon Sım «JI-demokratııalyq úkimet» tujyrymdamasyn tanystyrdy. Onyń aıtýynsha, jasandy ıntellekt azamattardyń ómir sapasyn jaqsartýǵa, memlekettik basqarýǵa qatysý múmkindigin keńeıtýge jáne ashyq ári adamǵa baǵdarlanǵan memlekettik basqarýdy qalyptastyrýǵa yqpal etedi.
Semınarda Grýzııa Ádilet mınıstrligi, BUU Damý baǵdarlamasy, Dúnıejúzilik bank, Halyqaralyq elektr baılanysy odaǵy jáne Rýmynııanyń Ulttyq ınformatıka zertteý ınstıtýtynyń ókilderi memlekettik sektorda jasandy ıntellektini engizý, tsıfrlyq qoǵamdyq ınfraqurylym, eseptilik jáne senimdi tsıfrlyq basqarý tájirıbelerimen bólisti.
Interaktıvti pikirtalas barysynda qatysýshylar memlekettik sektorǵa jasandy ıntellektini engizýdiń negizgi artyqshylyqtary men táýekelderin talqylap, ınstıtýtsıonaldyq daıyndyqty kúsheıtý, memlekettik qyzmetshilerdiń tsıfrlyq quzyretterin arttyrý jáne qoǵamnyń senimin nyǵaıtý máselelerine toqtaldy.
Forýmǵa qatysqan 12 memlekettiń ókilderi óz elderinde jasandy ıntellektini memlekettik basqarýǵa engizý boıynsha júzege asyrylyp jatqan jobalardy tanystyryp, qol jetkizilgen nátıjeler men aldaǵy basymdyqtardy ortaǵa saldy.
Sapar aıasynda Astana memlekettik qyzmet haby Basqarýshy komıtetiniń tóraǵasy Alıhan Baımenov Bangladesh, Kambodja, Fılıppın jáne Laos ókilderimen, sondaı-aq BUU men Eýropa Keńesiniń ókilderimen ekijaqty kezdesýler ótkizip, tsıfrlyq memlekettik basqarý salasyndaǵy yntymaqtastyqty damytý máselelerin talqylady.
Semınardy Astana memlekettik qyzmet haby, Qazaqstandaǵy BUU Damý baǵdarlamasy, Koreıa Respýblıkasynyń Іshki ister jáne qaýipsizdik mınıstrligi, Koreıa Respýblıkasynyń Ulttyq aqparattyq qoǵam agenttigi jáne Grýzııa Ádilet mınıstrligi birlesip uıymdastyrdy.
