BUU: El-Nıno saldarynan taǵy 49 mln adam azyq-túlik tapshylyǵyna ushyraýy múmkin
ASTANA. KAZINFORM – BUU-nyń Dúnıejúzilik azyq-túlik baǵdarlamasy (DATB) kúsheıip kele jatqan «El-Nıno» klımattyq qubylysy 2027 jyldyń sońyna qaraı álemde taǵy keminde 49 mıllıon adamnyń ótkir azyq-túlik tapshylyǵyna tap bolýyna ákelýi múmkin ekenin eskertti, dep habarlaıdy Anadolý.
DATB-nyń jazbasha málimdemesinde «El-Nıno» ashtyqpen kúresip jatqan elderdegi jaǵdaıdy odan ári ýshyqtyratyny atap ótilgen. Uıymnyń baǵalaýynsha, 2027 jyldyń sońyna qaraı ótkir azyq-túlik tapshylyǵyna ushyraıtyn adamdar sany 225 mıllıonnan 274 mıllıonǵa deıin artady.
Málimdemede osylaısha taǵy keminde 49 mıllıon adamnyń ótkir azyq-túlik tapshylyǵy jaǵdaıyna tap bolatyny aıtylǵan.
Málimdemede keltirilgen DATB atqarýshy dırektorynyń mindetin atqarýshy Karl Skaýdyń aıtýynsha:
– «El-Nıno» qubylysy onsyz da osal jaǵdaıda turǵan mıllıondaǵan adamnyń azyq-túlik qaýipsizdigine eleýli qater tóndiredi, – dedi ol.
DATB málimetinshe, «El-Nıno» qubylysynyń eń joǵary belsendi kezeńi bıylǵy qyrkúıek pen jeltoqsan aralyǵynda bolady dep kútiledi. Alaıda onyń saldary 2027 jyldyń sońyna deıin sezilýi múmkin.
Uıymnyń boljamynsha, «El-Nınonyń» áseri eń aldymen Ortalyq Amerıka men Afrıkanyń ońtústiginde aıqyn baıqalady.
«El-Nıno» jáne «La-Nınıa» degenimiz ne?
«El-Nıno» – Tynyq muhıtynda paıda bolatyn klımattyq qubylys. Ol muhıt sýynyń temperatýrasynyń kóterilýine ákelip, ásirese jaǵalaýdaǵy óńirlerde jáne álemniń kóptegen bóliginde aýa raıynyń ózgerýine sebep bolady.
Al «La-Nınıa» – «El-Nınoǵa» qarama-qarsy qubylys. Ol álemniń kóptegen óńirinde aýa raıynyń salqyndaýyna yqpal etedi. Al «El-Nıno» men «La-Nınıanyń» aýysý kezeńinde beıtarap, ıaǵnı tabıǵı klımattyq jaǵdaılar baıqalady.
Eske sala ketsek, maýsym aıynda BUU aldaǵy aptalarda El-Nıno kúsheıetinin eskertken.
Al kóp uzamaı Aýstralııa El-Nıno bastalǵanyn resmı túrde jarııalady.
