BUU: Ebolamen kúreske taǵy 1,5 mlrd. dollar qajet
BRıÝSSELЬ. QazAqparat - Búgin Davostaǵy Dúnıejúzilik ekonomıkalyq forýmda BUU Bas hatshysynyń orynbasary Valerı Amos pen Bas hatshynyń Ebolamen kúres jónindegi arnaıy elshisi Devıd Nabarro vırýspen kúres jónindegi qyzmet nátıjeleriniń sholýyn usyndy.
Ózderiniń tanystyrylymy barysynda BUU sheneýnikteri 2015 jyldyń alǵashqy alty aıynda Ebolamen kúreske 1,5 mlrd. dollar qarajat qajettigin alǵa tartyp, álemdik qoǵamdastyqty kómekke shaqyrdy. BUU ókilderi donorlar bul qajettilikke ún qatyp, tıisti qarajatty usynatyndyǵyna senimderin bildirdi.
Halyqaralyq sheneýnikter 2014 jyly vırýspen kúres baǵdarlamasyn qarjylandyrý indet eń kóp taraǵan úsh elde (Gvıneıa, Lıberııa jáne Serra-Leone) Ebolaǵa ushyraýdyń jańa oqıǵalary tómendegenine sendirdi. Ótken jyly bul maqsatqa 500 mln. dollarǵa tarta qarjy jınalǵan bolatyn.
Birikken Ulttar Uıymy sońǵy kezderde vırýs juqtyrǵandardyń sany tómendeýiniń oń serpinin atap ótýde. Ebola indetiniń Batys Afrıkaǵa taralýyna jol berilgen joq.
«Aýrýdyń aınalasyn jalmap taralýy báseńdedi, indet keıin shegine bastady», - dep atap ótti Devıd Nabarro.
Belgili bolǵandaı, aýrýdyń taralýy 2013 jylǵy jeltoqsanda Gvıneıada Eboladan kóz jumǵan baladan bastaldy. Ol kezde áli de anyqtalmaǵan indet 3 aıdyń ishinde kóptegen taralý býyndary arqyly qalalarǵa jáne aýyldyq jerlerge jaıyldy.
Alǵashqy kezde aýrýǵa qate dıagnoz qoıyldy, 2014 jylǵy 21 naýryzda ǵana ony qozdyratyn Ebola vırýsy Gvıneıada tereń tamyr jaıyp, búkil afrıkalyq qurlyqqa tez taraı bastaǵany anyqtaldy.
Dúnıejúzilik densaýlyq saqtaý uıymynyń sońǵy málimetteri boıynsha, Ebola vırýsynyń qurbandary 8,6 myń adamǵa jetken. Ony juqtyrǵandar men mert bolǵandardyń bári Lıberııa, Gvıneıa jáne Serra-Leone elderinde boldy.
