BUU: densaýlyq saqtaý júıesine ınvestıtsııa salynbasa, álem joıqyn pandemııaǵa tap bolýy múmkin
ASTANA. KAZINFORM — COVID-19 pandemııasy juqpaly aýrýlar men indetterdiń adamdardyń ómirine jáne áleýmettik-ekonomıkalyq damýǵa, ásirese eń kedeı ári osal elderge qandaı apatty saldar ákelýi múmkin ekenin aıqyn kórsetti, dep habarlaıdy BUU Jańalyqtary.
Bul týraly BUU 27 jeltoqsanda atap ótiletin Halyqaralyq epıdemııaǵa daıyndyq kúnine oraı eske saldy.
Epıdemııa men pandemııa ulttyq densaýlyq saqtaý júıesine shamadan tys salmaq túsiredi, jahandyq jetkizý tizbekterin buzady jáne áıelder men balalardy qosa alǵanda, halyqtyń osal toptaryna proportsıonaldy emes deńgeıde qatty áser etedi.
Halyqaralyq qaýymdastyq tarapynan tıisti nazar bolmaǵan jaǵdaıda, bolashaq epıdemııa aýqymy men aýyrlyǵy jaǵynan burynǵy indetterden de asyp túsýi múmkin.
Osyǵan baılanysty aqparattandyrýdy arttyryp, aqparat, ǵylymı bilim men ozyq tájirıbe almasýǵa, sondaı-aq jergilikti, ulttyq, óńirlik jáne jahandyq deńgeıde bilim berý jáne aǵartýshylyq baǵdarlamalardy damytýǵa erekshe mán beriledi.
BUU sonymen qatar epıdemııalardyń aldyn alý sharalaryn kúsheıtý jáne kez kelgen bolashaq qaýip-qaterge jedel áreket etip, tótep berý úshin daıyndyqty arttyrý qajettigin atap ótedi. Bul turǵyda adam densaýlyǵy, janýar jáne ósimdik álemi salalary, sondaı-aq tabıǵatty qorǵaý jáne basqa da tıisti qurylymdar arasyndaǵy yntymaqtastyqty damytýǵa yqpal etetin «Birtutas densaýlyq» keshendi tásili mańyzdy ról atqarady.
— Bizdiń eń myqty qorǵanysymyz — tek ǵylym ǵana emes, sonymen qatar kúshti jergilikti densaýlyq saqtaý júıeleri, barlyq qajettilikpen qamtamasyz etilgen, aldyńǵy shepte turǵan medıtsına qyzmetkerleri jáne daǵdarys jaǵdaıynda óz qaýymdaryn bastap júre alatyn jergilikti kóshbasshylar, — dedi BUU Bas hatshysy Antonıý Gýterrısh osy kúnge arnalǵan joldaýynda.
Epıdemııalarǵa qarsy áreket etý boıynsha jahandyq kúsh-jigerdi úılestirýde Birikken Ulttar Uıymy júıesi, ásirese Dúnıejúzilik densaýlyq saqtaý uıymy, áli de ortalyq ról atqaryp keledi.
Bas hatshy epıdemııa men pandemııa qaýpi kúsheıip, gýmanıtarlyq daǵdarys kóbeıip jatqanyn eske sala otyryp, «áreketti keıinge qaldyrýǵa bolmaıtynyn» aıtty.
Osyǵan baılanysty elder Dúnıejúzilik densaýlyq saqtaý uıymymen birlesip Pandemııalarǵa qarsy kúres jónindegi kelisimdi ázirledi. Onyń maqsaty — álem boıynsha vaktsınaǵa, em-domǵa, jabdyqtarǵa, aqparatqa jáne medıtsınalyq kómekke teń qoljetimdilikti qamtamasyz etý.
— Adamzat qorǵalǵan kezde, bárimiz de qorǵalamyz, — dep túıindedi BUU basshysy.
Aıta ketelik BUU 2026 jyly 135 mln adamǵa gýmanıtarlyq kómekke 33 mlrd dollar suraǵan edi.