BUU DB Qazaqstanda jańa «jasyl» mobıldik qosymshany iske qosady
ASTANA. QazAqparat - Qazaqstanda 15 qarashadan bastap tabıǵat resýrstaryn tıimdi paıdalaný men qorshaǵan ortany qorǵaý maqsatynda «Kómirtektik izińdi bil» mobıldik qosymshasy iske qosylady, dep habarlaıdy primeminister.kz.
«Qazaqstanda bul baǵytta BUU DB qoldaýymen kóptegen jańa jobalar júzege asyrylýda, qazir «Tómengi kómirtektik damýdyń turaqty qalalary» iri jobasy júzege asyrylýda. Bul qala ekonomıkasynyń, áleýmettik salanyń damýy men qorshaǵan orta qorǵaýdyń ońtaıly úılesimi bolyp tabylady. Eger bizdiń qalalar turaqty damymaıtyn bolsa, onda biz halyq úshin qajetti paıdany taba almaımyz. Bul sapaly kólik, sapaly baspana, sapaly qyzmet», - dedi energııa tıimdiligi boıynsha BUUDB, QR Úkimeti men MEQ jobalarynyń menedjeri Aleksandr Belyı «TKSh-EKSPO-2016» halyqaralyq forýmyn ótkizý aıasynda.
«TKSh-EKSPO-2016» kórmesinde BUUDB «Kómirtektik izińdi bil» jańa zamanaýı ónimin usyndy, ony árbir qazaqstandyq qoldana alady.
«Kez kelgen adam klımatqa áser etedi, kólikpen júremiz, elektr energııasyn, jylý energııasyn qoldanamyz, taýarlar satyp alamyz - osynyń barlyǵy SO2 qaldyǵyn shyǵarý arqyly jahandyq klımatqa áser etedi. Osy áserdiń mólsherin monıtordan esepteýge bolady, bul baǵdarlama 15 qarashadan bastap Google Play jáne App Store-da qoljetimdi bolady, ıaǵnı kez kelgen adam baǵdarlamany júktep alyp, óziniń kómirtegi izin eseptep, klımatqa qalaı áser etetinin bile alady», - dedi A. Belyı.
Mamannyń aıtýynsha, atalmysh ónim birinshi kezekte qatardaǵy tutynýshyǵa, ásirese jastarǵa baǵyttalǵan.
«Jastar ózderiniń negatıvti áserin qalaı azaıtýǵa bolatynyn túsinip, energııany az jumsap, sýdy únemdep, qoǵamdyq kólikpen júrip, az qoqys tastaıtyn bolady», - dedi ol.
Sondaı-aq, onyń aıtýynsha, qosymshada usynystar qarastyrylǵan, ıaǵnı ár adam óz iziniń sertıfıkatyn prınterden shyǵaryp alady, onda óziniń kómirtegi izin azaıtýdyń naqty usynystary beriledi. Budan ózge, ázirleýshiler belsendi qoldanýshylardy yntalandyrý úshin bonýstyq júıeni oılastyrýda.
«Bonýstyq júıeniń máni - adam qanshalyqty az kómirtek izin qaldyrsa, sonshalyqty kóp bonýs alady», - dedi ol.
Aıta ketý kerek, atalmysh qosymsha Eýropa nemese Amerıkaǵa saı kelmeıtin, qaldyqtardyń ulttyq shamasy aıasynda, Qazaqstan jaǵdaıyna negizdelip ázirlengen.
Eske sala keteıik, Astanada «TKSh-EKSPO-2016» halyqaralyq forýmy ótip jatyr, oǵan 100-den astam otandyq jáne sheteldik óndirýshiler qatysýda.
Kórmege TKSh jáne qurylys salasyndaǵy jańashyldyqtar qoıylǵan. Munda energııa únemdeý, energııa tıimdiligi, jylý-, gaz-, jáne sýmen qamtamasyz etý, tazartý tehnologııalary, jylý-, dybys-, gıdro oqshaýlaý, jaryq tehnıkasy, elektr jabdyǵy, elektr tehnıkasy, qurylys materıaldary jáne tehnologııalary, kommýnaldy shyǵyndar, kommýnaldy tehnıka, abattandyrý, aýla alańdary jáne ózge de TKSh sektoryn jandandyrý men qurylys ındýstrııasynyń mańyzdy baǵyttary qamtylǵan.
