BUU DB: 2020 jylǵa qaraı Qytaı, Úndistan men Brazılııa jıyntyq ekonomıkalyq ónimi álemniń alpaýytyna aınalady

ASTANA. 8 sáýir. QazAqparat - Adam damýy týraly baıandamanyń málimetteri boıynsha, 2020 jylǵa qaraı úsh derjavanyń: Qytaı, Úndistan jáne Brazılııanyń jıyntyq ekonomıkalyq ónimi Germanııa, Frantsııa, Italııa, Ulybrıtanııa, Kanada, AQSh-ty qosa alǵanda basyp ozady. Búgin Syrtqy ister mınıstrliginde ótken BUU Damý Baǵdarlamasynyń «Ońtústiktiń órleýi: alýan túrli álemdegi adamı progress» atty ǵalamdyq baıandamasynyń aımaqtyq tusaýkeseri barysynda BUU DB Aımaqtyq ortalyǵynyń dırektory Olıver Adam osylaı málim etti.

Onyń aıtýynsha, búgingi damý álemi 1995 jylmen salystyrǵanda áldeqaıda ózgerip ketti. Geosaıası áserlerdiń arqasynda damýshy elder paıda boldy. «Bul baıandamada biz alǵash ret ósim men ózgerister rychagyna aınalatyn «Ońtústiktiń órleýine» barynsha mán berip otyrmyz. Rasynda, ońtústikten keletin qaıta qurylymdaýlardy álemniń kóptegen halyqtary bastan keship otyr. Adam damýy týraly baıandamanyń málimetteri boıynsha, 2020 jylǵa qaraı úsh derjavanyń: Qytaı, Úndistan jáne Brazılııanyń jıyntyq ekonomıkalyq ónimi Germanııa, Frantsııa, Italııa, Ulybrıtanııa, Kanada, AQSh-ty qosa alǵanda basyp ozady. Bundaı ózgeristerdiń ózi dál osy ońtústiktegi taýar aınalymynyń aǵynyna, tehnologııalar jasaýǵa, ınvestıtsııaǵa da barynsha áser etpek», - dedi O. Adam.

Sonymen qatar, BUU ókili Qazaqstannyń aımaqtaǵy lıderlik qarymyna toqtala kele, elimizdiń «jasyl ekonomıka» bastamasyn barynsha qoldaıtynyn, Qazaqstannyń «óńirlik daýysynyń» nyǵaıýyna, kóshbasshylyǵyna qoldaý bildiretinin atap ótti.