BUU-dan bizge Másimov týraly resmı usynym túsken joq – Bas prokýrordyń orynbasary

ASTANA. QazAqparat – QR Bas prokýrorynyń orynbasary Áset Shyndalıev Kárim Másimovtyiń ustalýyna baılanysty BUU-nyń málimdeme jarııalaýy týraly pikir bildirdi, dep habarlaıdy QazAqparat tilshisi.

«Birikken ulttar uıymy Ulttyq qaýipsizdik komıtetiniń burynǵy tóraǵasy Kárim Másimovtiń qamaýǵa alynýyna qatysty málimdeme jarııalanǵany habarlandy. Bas prokýratýra bul másele boıynsha ne deıdi ?», - dep surady jýrnalıst Senat kýlýarynda.

Bas prokýrordyń orynbasary ondaı málimetti áleýmettik jeliden kórgenimen, organǵa resmı usynym kelmegenin atap ótti.

«Men ony áleýmettik jeliden kórdim. Biraq jumys usynymdaryn áli kórgen joqpyn. Bizdiń Bas prokýratýraǵa resmı túrde túsken kezde ol boıynsha jumys isteımiz. Sol usynym boıynsha keıin sheshim qabyldanady», - dedi Áset Shyndalıev.