BUU Damý baǵdarlamasy Tájikstannyń damýyna 84 mln dollar bóledi
ASTANA. KAZINFORM – Birikken Ulttar Uıymynyń Damý baǵdarlamasy Tájikstan úshin 2027-2030 jyldarǵa arnalǵan jańa eldik baǵdarlamany ázirledi.
Onyń bıýdjeti shamamen 84,07 mln dollardy quraıdy, dep habarlaıdy Kazinform agenttiginiń Dýshanbedegi menshikti tilshisi.
Qujat BUU DB, BUU Halyqty qonystandyrý qory jáne BUU Jobalarǵa qyzmet kórsetý baǵdarlamasy Atqarýshy keńesine usynyldy, onyń otyrysy 24-27 tamyz aralyǵynda Nıý-Iorkte ótedi. Negizgi baǵyttar – jumys oryndaryn qurý, bıznesti qoldaý, memlekettik qyzmetterdi tsıfrlandyrý, jasandy ıntellekt, klımat jáne ekologııa.
Jańa baǵdarlama resýrstarynyń negizgi bóligi — 35,84 mln dollar klımattyq jáne qorshaǵan ortany qorǵaý jobalaryna bólinedi.
BUU DB baǵalaýy boıynsha, Tájikstan muzdyqtary sońǵy ǵasyrda óz kóleminiń shamamen 30%-yn joǵaltty jáne 2070 jylǵa qaraı taǵy 15-20%-ǵa qysqarýy múmkin. Klımattyń ózgerýi aýyl sharýashylyǵy ónimdiliginiń tómendeýine baılanysty Tájikstannyń JІÓ-sin 2050 jylǵa qaraı 5-6%-ǵa azaıtýy múmkin.
Jańa baǵdarlamanyń basymdyqtaryna sondaı-aq jumys oryndaryn qurý jáne kásipkerlikti qoldaý jatady.
BUU DB málimetinshe, jyl saıyn shamamen 600 myń tájik azamaty jumys izdep shetelge ketedi, al aqsha aýdarymdary Tájikstan JІÓ-niń shamamen 45%-yn quraıdy. BUU DB ekonomıkalyq ártaraptandyrýdy ilgeriletý, shaǵyn jáne orta bıznesti damytý, 4700 adamdy suranysqa ıe mamandyqtarǵa oqytý jáne jańa jumys oryndaryn qurýdy usynyp otyr.
Taǵy bir baǵyt memlekettik basqarý jáne tsıfrlandyrýǵa qatysty.
BUU DB tsıfrlyq qyzmetter jobalaryna qoldaý kórsetý, jasandy ıntellekt jáne derektermen jumys isteý tehnologııalaryn paıdalanýdy josparlap otyr. Tájikstannyń JI engizýge daıyndyq kórsetkishi boıynsha pozıtsııasy 2030 jylǵa qaraı 10 orynǵa, ıaǵnı 130-shy orynnan 120-shy orynǵa deıin jaqsartý josparlanǵan.
Osyǵan deıin BUU Iemende qaýipsizdik jaǵdaıy nasharlaǵanyn málimdegen bolatyn.
