BUU Damý baǵdarlamasy Qazaqstannyń áleýmettik salany tsıfrlandyrýdaǵy jetistigin joǵary baǵalady
ASTANA. KAZINFORM – QR Premer-Mınıstriniń orynbasary Tamara Dúısenova BUU Damý baǵdarlamasynyń Qazaqstandaǵy turaqty ókili Katarjına Vavernıamen kezdesti.
Kezdesý barysynda QR Úkimeti men halyqaralyq uıym arasyndaǵy yntymaqtastyqtyń joǵary deńgeıi atap ótildi. 30 jyldan astam ýaqyt ishinde ártúrli salada birqatar ózara tıimdi jobalar iske asyryldy. Aldaǵy birlesken josparlar da pysyqtaldy.
«Katarjına Vavernıa Eńbek jáne halyqty áleýmettik qorǵaý mınıstrligimen ınklıýzıvti ortany jetildirý, múgedekterdi ońaltý jáne rabılıtatsııalaý sharalary boıynsha yntymaqtastyqty nyǵaıtýǵa qyzyǵýshylyq bildirdi. Ol sondaı-aq densaýlyq saqtaý salasyn, kreatıvti ındýstrııany tsıfrlandyrýdy damytý boıynsha birqatar usynys aıtty», - delingen habarlamada.
Tamara Dúısenova usynylǵan sharalardy qarastyrýǵa daıyn ekenin bildirip, tıisti mınıstrlikterge tapsyrma berdi. Sonymen qatar vıtse-premer elimizdiń BUU-nyń 2030 jylǵa deıingi turaqty damý maqsattaryn júzege asyrýǵa aıryqsha kóńil bolyp otyrǵanyn atap ótti.
Budan bólek, BUU DB Qazaqstannyń áleýmettik salany tsıfrlandyrýdaǵy jetistikterin joǵary baǵalaıtyny aıtyldy. Osy úderiske qosqan eleýli úlesi úshin Tamara Dúısenovaǵa BUU Damý baǵdarlamasynyń «Tsıfrlandyrý boıynsha jyl úzdigi» sertıfıkaty tabystaldy.
