BUU Damý baǵdarlamasy Qazaqstanda 4 jańa sý qoımasyn salýǵa atsalysady

ASTANA. KAZINFORM — Sý resýrstary jáne ırrıgatsııa mınıstri Nurjan Nurjigitov BUU Damý baǵdarlamasynyń (BUUDB) Qazaqstandaǵy turaqty ókili Katarjına Vavernıamen kezdesti, dep habarlaıdy vedomstvonyń baspasóz qyzmeti.

Kezdesýde taraptar Islam damý banki qarjylandyratyn «Klımatqa tózimdi sý resýrstaryn damytý» jobasy aıasyndaǵy birlesken jumysty talqylady.

Jobanyń birinshi kezeńinde 4 jańa sý qoımasyn salý, qoldanystaǵy 4 sý qoımasyn jáne 115 kanaldy rekonstrýktsııalaý kózdelgen.

Mınıstrlik mamandary men BUUDB sarapshylary ǵylymı tásilderdi qoldaný, jobanyń tıimdiligin arttyrý sharalaryn jáne jumysqa qatysýshy taraptardyń ózara is-qımylyn pysyqtady.

Aıta keteıik, bıyl shilde aıynda Sý resýrstary jáne ırrıgatsııa mınıstrligi men Islam damý banki jobaǵa BUUDB-ny halyqaralyq keńesshi retinde tartý jóninde sheshim qabyldaǵan bolatyn.

— BUUDB-nyń qatysýy jobany jańa deńgeıge shyǵarady. Islam damý banki qarjylandyratyn jumystar sý resýrstaryn basqarý júıesin damytý tujyrymdamasyn iske asyrýǵa baǵyttalǵan. Jobany sátti oryndaý úshin normatıvtik-quqyqtyq baza jańartyldy, qajetti ınstıtýttar quryldy, qarjy kózderi tartyldy. Endi qolǵa alynǵan jumysty sońyna jetkizý qajet. Yntymaqtastyǵymyz tujyrymdamada belgilengen maqsattarǵa qol jetkizýge múmkindik beredi dep senemiz, — dedi Sý resýrstary jáne ırrıgatsııa mınıstri Nurjan Nurjigitov. 

Buǵan deıin Islam damý banki Astanada sý salasyn damytý jobalaryn tıimdi júzege asyrý úshin satyp alý, qarjy menedjmenti, adaldyq jáne etıka máseleleri boıynsha oqytý semınarlaryn ótkizgen bolatyn.

Osydan buryn Almatyda memleketke qaıtarylǵan sý qoımalary qaıtadan senimgerlik basqarýǵa beriletini aıtyldy.