BUU-daǵy Iran elshisi: Bolgarııadaǵy lańkestikti Izraıl uıymdastyrdy
ASTANA. 26 shilde. QazAqparat - Birikken Ulttar Uıymyndaǵy Iran elshisi Mohammed Hazaı 18 shilde kúni halyqaralyq Sarafovo áýejaıynyń turaǵynda, Bolgarııanyń Býrgas qalasynda oryn alǵan lańkestik aktini ızraıldik bılik ókilderi uıymdastyrdy dep kinálady.
«Sıonıstik krımınaldyq rejimniń ókilderi meniń elimdi negizsiz aıyptady. Iran eshqashanda beıkúná adamdarǵa jasalǵan mundaı qara nıetti shabýylǵa qatyspaıdy», - dedi ırandyq dıplomat.
Esterińizge sala keteıik, 18 shilde kúni keshke qaraı Býrgastyń halyqaralyq áýejaı turaǵynda demalýǵa kelgen ızraıldik týrıster mingen avtobýs jarylǵan bolatyn. Jarylǵysh zatty jankeshti-lańkes iske qosty. Oqıǵa saldarynan 7 adam ajal qushyp, 33 týrıst jeńil jaralandy. Al bir áıel men bir er adam asa aýyr halde aýrýhanaǵa jetkizilgen edi.
Lańkestik árekettiń artynsha Izraıldiń premer-mınıstri Bınıamın Netanıahý bul jarylysty Iran uıymdastyrdy dep aıyptady.
Bul keleńsiz oqıǵadan 3 kún ótkennen keıin Býrgastaǵy jarylysty buǵan deıin beımálim bolyp kelgen, ózderin «Djıhad negizi» dep ataıtyn lańkestik uıym óz moınyna aldy.
