BUU dabyl qaqty: Sýdanda mıllıondaǵan adam kúndelikti as-aýqattan qaǵylǵan

ASTANA. KAZINFORM – Sýdanda shamamen 25 mıllıon adam azyq-túlik tapshylyǵyn sezinip otyr, dep habarlaıdy Anadoly.

Bul týraly BUU-nyń Dúnıejúzilik azyq-túlik baǵdarlamasynyń Sýdan boıynsha tótenshe jaǵdaılar jónindegi úılestirýshisi Samanta Chattaradj málimdedi.

Chattaradjdyń aıtýynsha, bul el halqynyń jartysyna jýyǵy.

— El boıynsha shamamen 25 mıllıon adam, ıaǵnı halyqtyń jartysy ash otyr. Sonymen qatar shamamen 5 mıllıon bala men emizýli balasy bar ana toıyp tamaq ishpeıdi. Qazirgi ýaqytta Sýdan — álemde asharshylyq resmı túrde tirkelgen jalǵyz el, — dedi ol Jenevadaǵy BUU keńsesinde ótken apta saıynǵy brıfıngte.

Onyń aıtýynsha, Dúnıejúzilik azyq-túlik baǵdarlamasy sońǵy ýaqytta jaǵdaıdyń ýshyǵýyn boldyrmaý úshin birqatar shara qabyldaǵan. Tek naýryz aıynyń ózinde uıym Sýdan boıynsha 4 mıllıon adamǵa kómek kórsetken, bul ótken jylmen salystyrǵanda tórt ese kóp.

Sýdan armııasy men Jyldam áreket etý kúshteri arasyndaǵy qaqtyǵys 2023 jyldyń 15 sáýirinen beri jalǵasyp keledi jáne qazirgi tańda úshinshi jylyna aıaq basty.

BUU málimetine sáıkes, bul qaqtyǵys álemdegi eń iri kóshi-qon daǵdarysyna sebep boldy, eldiń ınfraqurylymyna, densaýlyq saqtaý, bilim berý jáne ekonomıka salalaryna aýyr zalal keltirdi.

Qaqtyǵys saldarynan 11 mıllıonnan astam adam el ishinde kóship-qonýǵa májbúr boldy, al 4 mıllıonǵa jýyq adam kórshiles elderdiń shekarasynan ótip ketken.

23 aıdan keıin Sýdan armııasy astanasy Hartýmnyń kóp bóligin baqylaýǵa aldy, al jedel áreket etý kúshteri eldiń batysyndaǵy Darfýr aımaǵyna shoǵyrlandy. Olar Darfýrdyń bes provıntsııasynyń tórteýin baqylaýda ustap otyr.

Shamamen bir jyl boıy JÁK Soltústik Darfýrdyń ákimshilik ortalyǵy El-Fashır qalasyn qorshaýda ustap tur. Bul olardyń baqylaýynan tys qalǵan sońǵy provıntsııa. Qalada armııa men odaqtas kúshter áli de qarsylyq kórsetip jatyr.

Aıta ketelik Sýdandaǵy qaqtyǵystar 332 myńnan asa adamdy úılerin tastap ketýge májbúr etti.