BUU-da Reseı delegatsııasy Grýzııa Prezıdentin tyńdaýdan bas tartty
ASTANA. 26 qyrkúıek. QazAqparat - Grýzııa prezıdenti Mıhaıl Saakashvılıdiń baıandamasy barysynda reseılik delegatsııa BUU Bas assambleıasynyń zalynan shyǵyp ketti. Syrtqy ister mınıstrliginiń ókili Aleksandr Lýkashevıchtiń aıtýynsha, Grýzııa basshysynyń oı-tujyrymymen kelispegen reseılik delegatsııa osyndaı qadam jasaýǵa májbúr bolǵan eken.
Sheteldik BAQ-tyń jazýynsha, grýzııalyq prezıdent óziniń sózinde kóptegen elderge qaraǵanda Reseı tarapy kórshiles elderdiń turaqtylyǵyna múddeli emes ekenin jáne Grýzııadaǵy, Ýkraınadaǵy, sondaı-aq Moldovadaǵy myqty úkimet ıdeıasyn moıyndamaıtynyn aıtqan.
Saakashvılıdiń sózinshe, Máskeý bılikke myqty úkimetter kelgen jaǵdaıda memleketter táýelsiz bolyp, Eýropaǵa jaqyndaı bastaıtynyn túsinip otyr.
Sonymen qatar ol Reseı tarapyn Abhazııa men Ońtústik Osetııany basyp aldy dep aıyptady.
