BUU-da Qazaqstannyń 71 azamaty volonter bolyp qyzmet etedi

NUR-SULTAN. QazAqparat – Qazaqstandyq volonterler ózderiniń kásibı sheberlikterin kórsetip, BUU tarapynan joǵary baǵa aldy. Bul týraly QR Aqparat jáne qoǵamdyq damý mınıstri Asqar Omarov málim etti, dep habarlaıdy QazAqparat tilshisi.

«Qazaqstanda halyqaralyq volonterlikti damytý mańyzdy. Búgingi forýmnyń seriktesi – BUU eriktiler baǵdarlamasy. Búginde BUU júıesinde Qazaqstannan 71 volonter jumys isteıdi. Onyń ishinde 42 áıel bar. Sonymen qatar, qazaqstandyq 7 volonter bizdiń mınıstrlik pen BUU eriktiler baǵdarlamasy arasyndaǵy seriktestik týraly kelisim aıasynda Iordanııa, Kenııa, Túrkııa jáne Taılandtaǵy BUU-nyń túrli qurylymdarynda tabysty eńbek etip jatyr. Bizdiń elden shyqqan volonterler ózderiniń kásibı sheberlikterin kórsetip, BUU tarapynan joǵary baǵa aldy. Oń tájirıbeni eskere otyryp, biz osy baǵyttaǵy jumysty jalǵastyrýǵa nıettimiz», - dedi Asqar Omarov elordada ótken Ortalyq Azııa elderi volonterleriniń forýmynda.

Onyń aıtýynsha, 2020 jyly Qazaqstannyń bastamasy boıynsha BUU Bas Assambleıasy qararynyń mátinine «Volonterlikti turaqty damý salasyndaǵy kún tártibin iske asyrýdyń qýatty jáne ámbebap quraly dep taný týraly» jańa tarmaq engizildi. Atalǵan bastamany BUU-ǵa múshe memleketter qoldady.

«Biz eldegi volonterlikti odan ári damytýmen qatar, Memleket basshysynyń túrli halyqaralyq dıalog alańdarynda eriktilerdi jumyldyrýdyń halyqaralyq jylyn jarııalaý týraly bastamasyn ilgeriletýmen aınalysamyz», - deıdi ol.

Buǵan deıin QR Aqparat jáne qoǵamdyq damý mınıstri Asqar Omarov qaıyrymdy ister marafony aıasynda 5 mln adamǵa ataýly kómek kórsetilgeni týraly aıtqan edi.