BUU-da Qazaqstannyń UN Water halyqaralyq uıymyn qurý bastamasy tanystyryldy
ASTANA. KAZINFORM – Qazaqstannyń BUU janynan halyqaralyq sý uıymyn qurý bastamasy Birikken Ulttar Uıymynda ótken Dúnıejúzilik sý kúnine arnalǵan is-sharada tanystyryldy, dep habarlaıdy QR SІM baspasóz qyzmeti.
Іs-sharaǵa Qazaqstan Respýblıkasynyń BUU janyndaǵy Turaqty ókili Qaırat Omarov qatysty. Ol óz sózinde sý resýrstary qoǵamdyq densaýlyqtyń, azyq-túlik qaýipsizdiginiń jáne ornyqty damýdyń negizi ekenin atap ótti. Sondaı-aq sýǵa teń qoljetimdilikti qamtamasyz etý ádilettilik pen ınklıýzııa máselelerimen tikeleı baılanysty ekenin aıtty.
Qazaqstan tarapy klımattyń ózgerýi, ekojúıelerdiń degradatsııasy, turaqsyz tutyný jáne gıdrologııalyq tsıkldiń buzylýy saldarynan jahandyq sý resýrstaryna túsetin qysym kúsheıip otyrǵanyn málimdedi. Qaýipsiz aýyz sý men sanıtarııaǵa qoljetimdilik tapshylyǵy saqtalyp otyrǵan jaǵdaıda halyqaralyq yntymaqtastyqty nyǵaıtý jáne sý salasyndaǵy jahandyq basqarý júıesin jetildirý erekshe mańyzdy ekeni atap ótildi.
Osyǵan baılanysty is-shara qatysýshylaryna Qazaqstan Respýblıkasynyń Prezıdenti Qasym-Jomart Toqaevtyń BUU-80 reformasy aıasynda BUU qamqorlyǵymen mamandandyrylǵan halyqaralyq sý uıymyn qurý bastamasy tanystyryldy.
– Bul bastama ınstıtýtsıonaldyq tıimdilikti arttyrýǵa, fýnktsııalardyń qaıtalanýyn azaıtýǵa jáne sý máselesine tıisti saıası deńgeı berýge baǵyttalǵan, – dep málimdedi QR SІM.
Sondaı-aq atalǵan másele boıynsha alǵashqy halyqaralyq konsýltatsııalar bıyl sáýir aıynda Astanada ótetin óńirlik ekologııalyq sammıt aıasynda uıymdastyrylatyny habarlandy. Qazaqstan BUU-ǵa múshe memleketter men seriktesterdi sý máselesine qatysty dıalogqa belsendi qatysýǵa shaqyrdy.
Eske salaıyq, 2025 jylǵy 20 jeltoqsanda Memleket basshysy Qasym-Jomart Toqaev Tokıoda ótken «Ortalyq Azııa – Japonııa» dıalogynyń alǵashqy sammıtinde Qazaqstan BUU aıasynda jańa halyqaralyq uıym – UN Water International Organization qurýdy usynǵan bolatyn. Bul qurylym sý máselesine qatysty ártúrli uıymdardyń ókilettikterin biriktirýge baǵyttalǵan.
Aıta keteıik, BUU otandyq ınklıýzıvti jobany joǵary baǵalady.
