BUU-da Qazaqstandaǵy áıelderdiń róli jónindegi baıandama tanystyryldy

NUR-SULTAN. QazAqparat – Jenevada BUU-nyń áıelderge qatysty kemsitýshilikterdi joıý jónindegi komıtetinde Áıelderge qatysty kemsitýshiliktiń barlyq nysandaryn joıý jónindegi konventsııany Qazaqstan Respýblıkasynyń oryndaýy týraly baıandamany qorǵaýy ótkizildi, dep habarlaıdy QazAqparat.

Qazaqstandyq delegatsııa quramyna Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa, Joǵarǵy sot, Bas prokýratýra, Memlekettik qyzmet isteri jónindegi agenttigi, Іshki ister, Eńbek jáne halyqty áleýmettik qorǵaý, Densaýlyq saqtaý, Bilim jáne ǵylym, Syrtqy ister, Aqparat jáne qoǵamdyq damý mınıstrlikteriniń, ÚEU ókilderi, sonymen qatar Adam quqyqtary jónindegi ýákil endi.

Qorǵaý barysynda delegatsııa basshysy, Ulttyq komıssııa tóraǵasy Gúlshara Ábdiqalyqova BUU sarapshylarynyń nazaryna Áıelderdiń qoǵamdyq-saıası, ekonomıkalyq jáne áleýmettik saladaǵy, áıelderdi kemsitýmen kúresýdegi rólin joǵarylatý boıynsha Qazaqstan Respýblıkasynyń Úkimeti, Parlamenti jáne úkimettik emes sektorlardyń ortaq qabyldaǵan amaldary týraly baıandamasyn usyndy.

Delegatsııa músheleri komıtet sarapshylarynyń suraqtaryna jaýap berdi jáne Qazaqstandaǵy áıelderdiń quqyqtary men múmkindikterin keńeıtý boıynsha negizgi ózgerister týraly aqparat usyndy, onyń ishinde: genderlik saıasatty iske asyrý boıynsha is-qımyldy úılestirý tetikterin ázirleý; barlyq saladaǵy áıelderdiń úlesin ulǵaıtý; bıznes ashýǵa, onyń ishinde aýyl áıelderine arnalǵan memlekettik qoldaý sharalaryn keńeıtý; áıelderdi zorlyq-zombylyqtan qorǵaý jáne t.b.

Komıtet músheleri ózderiniń suraqtary men pikirlerinde Qazaqstannyń konventsııany iske asyrý máselelerinde alǵa jyljyǵanyn atap ótti.

Dúnıejúzilik ekonomıkalyq forýmnyń baǵalaýy boıynsha Qazaqstan 2018 jyly genderlik alshaqtyq reıtıngi boıynsha 149 eldiń ishinde 60-shy orynǵa ıe boldy, onyń ishinde bilim alý boıynsha – 30-shy, áıelderdiń ekonomıkalyq múmkindikterin júzege asyrý boıynsha – 32-shi orynda. BUU Damý baǵdarlamasynyń adamı damý jónindegi esebine sáıkes Qazaqstan 2018 jyly Genderlik damý ındeksi boıynsha 58- orynǵa ıe boldy.

Komıtettiń otyrysy qarsańynda genderlik teńdik máselelerine basa nazar aýdara otyryp, Prezıdent Q.K.Toqaevtyń Joldaýy talqylanǵan dóńgelek ústel ótkizildi. Іs-shara barysynda G.N.Ábdiqalyqova, Qazaqstannyń BUU janyndaǵy Turaqty ókili J.S.Aıtjanova, BUU Jenevadaǵy bólimshesiniń bas dırektory T.D.Valovaıa, sonymen qatar Brazılııanyń, Koreıanyń, Ońtústik Afrıkanyń, Taılandtyń turaqty ókilderi sóz sóıledi.