BUU-da Ahmadınejadtyń sózi kezinde AQSh delegatsııasy oryndarynan turyp ketti
ASTANA. Qyrkúıektiń 24-i. QazAqparat - Iran Prezıdenti Mahmud Ahmadınejad Birikken Ulttar Uıymyn «2001 jylǵy qyrkúıektiń 11-indegi lańkestik árekettermen baılanysty faktilerdi tekserý úshin táýelsiz top qurýǵa» shaqyrdy. Bul týraly ol beısenbi kúni BUU Bas Assambleıasynyń 65-shi sessııasynda jalpysaıası jaryssóz barysynda málim etti, dep habarlaıdy ITAR-TASS agenttigi.
Bul tekserý «bolǵan oqıǵaǵa qatysty túrli kózqarastardy eskerýge jáne olarǵa tyıym salmaýǵa» múmkindik beredi, dep sanaıdy ol. «2001 jylǵy qyrkúıektiń 11-indegi lańkestik árekettiń úsh dolbary bar. Onyń bireýi - AQSh-tyń aýmaǵyna qýatty
lańkestik toptyń kirgeni týraly dolbar», - dedi Iran Prezıdenti óz sózinde. Al ekinshi dolbar retinde Ahmadınejad, «amerıkan ekonomıkasynyń quldyraýyn toqtatý jáne Taıaý Shyǵysqa pármenderin kúsheıtý úshin, ol qylmysty AQSh basshylyǵynyń keıbir ókilderi ózderi uıymdastyrýy» múmkindigi týraly pikirin bildirdi. «Halyqtyń kópshiligi osy pikirmen kelisedi», dedi Iran basshysy óz sózinde. Dál osy sózden keıin AQSh delegatsııasy Bas Assambleıa zalyn tastap, shyǵyp ketti.
Ahmadınejadtyń pikirinshe, úshinshi dolbar, «ol amerıkan úkimeti ózi qoldaý kórsetken jáne qalyptasqan jaǵdaıdy óz maqsattary úshin paıdalanǵan lańkestik toptardyń shabýyly». Sondyqtan da, aldymen sol lańkestik oqıǵalardyń barlyq sebepteri men faktilerine táýelsiz tekserý júrgizgen durys bolady», deıdi Iran Prezıdenti.
