BUU: COVID-19 indetinen qaıtys bolǵandar arasynda múgedekter kóp

NUR-SULTAN. QazAqparat – Álemde múgedektigi bar 1 mıllıardqa jýyq adamnyń ishinde COVID-19 koronavırýsynan qaıtys bolǵandar sany joǵary bolýda, pandemııa saldarynan olardyń quqyqtaryn qamtamasyz etý de nasharlady. Bul týraly BUU Bas hatshysy Antonıo Gýterresh málimdedi, dep habarlaıdy QazAqparat.

«COVID-19 indetine baılanysty daǵdarys qoǵamnyń barlyq salalaryna keri áserin tıgizdi. Búgin men pandemııanyń álemde múgedektigi bar 1 mıllıard adamǵa qalaı áser etkenine toqtap ótemin. Jarymjan adamdar – vırýstan bolǵan ólim oqıǵalary sany jaǵynan birinshi orynda», - dep jazdy ol óziniń Twitter -degi akkaýntynda.

BUU Bas hatshysy múgedektigi bar adamdardyń quqyqtarynyń qorǵalýyn, ásirese medıtsınalyq kómekke qoljetimdiligin kepildendirý qajettiligi týraly sóz qozǵap, pandemııaǵa qarsy kúres aıasynda bılikti bul adamdarǵa erekshe nazar aýdarýǵa shaqyrdy.

Eske sala ketsek, Dúnıejúzilik densaýlyq saqtaý uıymy 11 naýryz kúni COVID-19 jańa koronavırýs ınfektsııasynyń taralýyn pandemııa dep jarııalady. DDSU-nyń sońǵy málimetteri boıynsha, álemde vırýs juqtyrýdyń 3,5 mıllıonnan astam oqıǵasy tirkelgen, 243 myńnan astam adam qaıtys boldy.