BUU: bir aptada Gaıtıdiń 200-den astam turǵyny kóz jumdy

ASTANA.KAZINFORM - Qaza tapqandardyń kópshiligi baqsylyq jasady dep aıyptalǵan egde jastaǵy adamdar, dep jazady «Amerıka daýysy».

BUU-nyń dúısenbi kúngi málimdemesine sáıkes, Gaıtı astanasy Port-o-Prenste Wharf Jeremy bandasynyń músheleri kem degende 207 adamdy óltirdi. Alǵashynda qaza tapqandar sany 187 adam bolǵan.

BUU-nyń Adam quqyqtary jónindegi Joǵarǵy Komıssarynyń keńsesi qyrǵynǵa qatysty jańa baıandamasynda 300-ge jýyq qylmystyq top músheleriniń jappaı jazalaýy, urlaý jáne basyp alý áreketterinen bir aptadan az ýaqyt ishinde 134 er adam men 73 áıel óltirilgenin habarlady. Qaza tapqandardyń kópshiligi baqsylyq jasady dep aıyptalǵan egde jastaǵy adamdar.

Shabýyl banda jetekshisi Monel Felıkstiń buıryǵymen jasalǵan, ol aýyryp qalǵan balasyn jergilikti turǵyndar dýalady dep aıyptady. Qaza tapqandardyń kópshiligi výdý hramynan dinı rásimder kezinde urlanǵan, dep habarlady BUU.

BUU málimeti boıynsha, Felıks bandasy 15 jyldaı negizgi porttar, jaqyn mańdaǵy qoımalar jáne el astanasyna aparatyn ulttyq magıstraldar arasyndaǵy shaǵyn, biraq strategııalyq aımaqty baqylap kelgen.

Jappaı óltirýden keıin qylmystyq top músheleri uıaly telefondardy tárkilep, máıitterdi órtep, teńizge laqtyryp, aıǵaqtardy joımaq bolǵan.

BUU málimeti boıynsha, Gaıtıde qańtardan beri 5300-den astam, al 2022 jyldyń basynan beri 12 myńnan astam adam qaza tapty. Osy ýaqyt ishinde 700 myńnan astam adam el ishinde qonys aýdarýǵa májbúr boldy.